قازاقستانعا كەلگەن ميگرانتتاردىڭ سانى 620 مىڭعا جەتتى. بۇل تۋرالى ق ر ىشكى ىستەر ءمينيسترى قالمۇحانبەت قاسىموۆ بۇگىنگى ۇكىمەت ساعاتىندا مالىمدەدى، دەپ جازادى Qamshy.kz اقپارات اگەنتتىگى

"رەسمي ستاتيستيكا بويىنشا، سوڭعى ءۇش جىلدا ءبىزدىڭ ەلىمىزگە 5 ميلليون 600 مىڭنان استام شەتەلدىك ازاماتتار كەلگەن. ولاردىڭ 90 پايىزدان استامى تمد ەلدەرىنىڭ ازاماتتارى. نەگىزىنەن، وزبەكستاننان، قىرعىزستاننان جانە رەسەيدەن كەلگەن. سونداي-اق، الىس ەلدەردەن كەلگەن ميگرانتتاردىڭ قاتارى كوبەيۋدە. وسى ۋاقىتقا دەيىن ولاردىڭ سانى 620 مىڭعا دەيىن جەتتى. ولاردىڭ كوبى جۇڭگو جانە تۇرىك ازاماتتارى"، - دەپ اتاپ ءوتتى ق ر ىشكى ىستەر ءمينيسترى.

ءمينيستردىڭ ايتۋىنشا، باستى مىندەت زاڭسىز كوشى-قونعا توقتاۋ سالۋ، سەبەبى ول قوعامدىق ءتارتىپ ءۇشىن ءقاۋىپتى فاكتور بولىپ تابىلادى.

"ميگراسيا اعىمى ەسىرتكى، ادام ساۋداسى جانە ەكسترەميزم مەن تەرروريزمگە بايلانىستى بولعان جاعدايلار از ەمەس. بۇل سالادا باقىلاۋ مەن رەتتەۋدى ءتيىمدى ۇيىمداستىرماساق، ەلىمىزدىڭ الەۋمەتتىك-ەكونوميكالىق دامۋىنا زيان كەلتىرەدى. كوشى-قون باقىلاۋىن جەتىلدىرۋ جولدارىن ۇكىمەت ساعاتى شەڭبەرىندە تالقىلاۋ ىشكى ىستەر مينيسترلىگىنە، سونىمەن بىرگە، باسقا دا مۇددەلى ورتالىق جانە جەرگىلىكتى اتقارۋشى ورگانداردىڭ جۇمىستارىن تۇزەتۋگە مۇمكىندىك بەرەتىنى ءسوزسىز"، – دەدى ق ر ىشكى ىستەر ءمينيسترى ءماجىلىستىڭ ۇكىمەت ساعاتىندا.