ءماجىلىس سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا پالاتا «2018-2020 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا وزگەرىستەر مەن تولىقتىرۋلاردى ماقۇلدادى، دەپ جازادى Qamshy.kz اقپارات اگەنتتىگى.

بۇل وزگەرىستەر ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك»، «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋلارىن، سونداي-اق، پرەزيدەنتتىڭ بەس الەۋمەتتىك باستاماسىن جۇزەگە اسىرۋعا باعىتتالىپ وتىر.

بيۋدجەتتىڭ شىعىس بولىگىنە قاتىستى اقپاراتتارعا كەلگەندە ءماجىلىستىڭ قارجى جانە بيۋدجەت، الەۋمەتتىك-مادەني دامۋ كوميتەتتەرى تالدامالىق، سوسيولوگيالىق زەرتتەۋلەر جۇرگىزۋگە جانە كونسالتينگتىك كورسەتىلەتىن قىزمەتتەردى ساتىپ الۋعا ارنالعان بيۋدجەت شىعىستارىنىڭ ۇلعايتىلعانىنا ايرىقشا نازار اۋداردى. 

- ءبىز شىنىندا دا الەۋمەتتىك زەرتتەۋ جۇمىستارىنا جانە كونسالتينگ قىزمەتتەرگە ەرەكشە كوڭىل ءبولۋىمىز كەرەك. مىسالى، 2018 جىلعا ارنالعان بيۋدجەتتە الەۋمەتتىك زەرتتەۋ جۇمىستارىن جۇرگىزۋ ءۇشىن 17 مەملەكەتتىك ورگان 7،2 ملرد تەڭگە سالعان. بۇگىنگى ايقىندالعان بيۋدجەتتە الەۋمەتتىك زەرتتەۋلەر ءۇشىن تاعى دا 3،3 ملرد تەڭگە قاراستىرىلىپ وتىر، - دەدى ءماجىلىس ءتوراعاسى نۇرلان نىعماتۋلين.

سونداي-اق، ءماجىلىس ءتوراعاسى ءدال وسى بيۋدجەتتە مۇگەدەك جاندارعا قارايتىن ادامدارعا بولىنەتىن جاردەماقى ءۇشىن رەسپۋبليكالىق بيۋدجەتتەن 2،7 ملرد تەڭگە قاراستىرىلىپ وتىرعانىن، ال، ەلىمىزدە ورىن العان سۋ تاسقىندارىنا بايلانىستى ءىىم 1،6 ملرد تەڭگە بولگەلى وتىرعانىن العا تارتا كەلىپ،

- سوندا ءبىزدىڭ الەۋمەتتىك زەرتتەۋ سالاسىندا سۋ تاسقىندارىنان دا قيىن توتەنشە جاعداي تۋىنداپ وتىر ما؟ - دەدى ول.

ودان ءارى پالاتا سپيكەرى بۇل جاعدايدىڭ جىل سايىن قايتالانىپ وتىرعانىن ايتتى. ماسەلەن، وتكەن جىلى الدىمەن 770 ملن تەڭگە بولىنگەن، ال ناقتىلاۋ كەزىندە تاعى دا 540 ملن تەڭگە قوسىلعان. ال بيىل بولىنگەن 460 ملن تەڭگەگە قوسا، تاعى 800 ملن تەڭگە قاراستىرۋ كوزدەلىپ وتىر.

- سوعان قاراعاندا بۇل جىل سايىن وسى ماقساتقا (الەۋمەتتىك زەرتتەۋ) ارتىق قارجى جۇمساۋ كەرەك دەگەن جوسپار بار سياقتى، - دەي كەلىپ، قۇزىرلى ورگان وكىلدەرىنە بۇل ماسەلەنى وتە تياناقتى ءارى مۇقيات قاراۋ كەرەكتىگىن تاپسىردى.

بۇگىنگى تۇزەتۋلەرگە قاتىستى قوسىمشا قاراجاتتار تاعى دا،  مىناداي بيۋدجەتتىك باعدارلامالار اكىمشىلەرىنە بولىنبەك.  ماسەلەن، ينۆەستيسيالار جانە دامۋ مينيسترلىگىنە –  اۆتوموبيل جولدارىنىڭ ساپاسىن جاقسارتۋعا، «نۇرلى جەر» باعدارلاماسى شەڭبەرىندە ينجەنەرلىك ينفراقۇرىلىمدى دامىتۋعا، وڭىرلەردى دامىتۋدىڭ 2020 جىلعا دەيىنگى باعدارلاماسى شەڭبەرىندە اۋىلدىق ەلدى مەكەندەردە سۋمەن جابدىقتاۋ جانە سۋ بۇرۋ جۇيەلەرىن دامىتۋعا 100،6 ملرد. تەڭگە، ءبىلىم جانە عىلىم مينيسترلىگىنە – جاڭارتىلعان ءبىلىم بەرۋ مازمۇنى بويىنشا باستاۋىش، نەگىزگى جانە جالپى ورتا ءبىلىم بەرۋدىڭ وقۋ باعدارلامالارىن ىسكە اسىراتىن مەكتەپتەردىڭ مۇعالىمدەرىنە، سونداي-اق ۇلتتىق بىلىكتىلىك تەستىلەۋدەن وتكەن جانە باستاۋىش، نەگىزگى جانە جالپى ورتا ءبىلىمنىڭ ءبىلىم بەرۋ باعدارلامالارىن ىسكە اسىراتىن مۇعالىمدەردىڭ پەداگوگيكالىق شەبەرلىك بىلىكتىلىگى ءۇشىن قوسىمشا اقىلاردى تولەۋگە 112،4 ملرد. تەڭگە، اۋىل شارۋاشىلىعى مينيسترلىگىنە - اۋىل شارۋاشىلىعى جانۋارلارىن، تەحنيكا مەن تەحنولوگيالىق جابدىقتى ساتىپ الۋعا نەسيە بەرۋ، سونداي-اق ليزينگ كەزىندە سىياقى مولشەرلەمەلەرىن سۋبسيديالاۋعا، اوك-تى جانە اگرارلىق عىلىمدى دامىتۋعا، سۋ رەسۋرستارىن ءتيىمدى باسقارۋعا، جەرگىلىكتى اتقارۋشى ورگاندارعا بيۋدجەتتىك كرەديتتەر بەرۋ ارقىلى مەملەكەتتىك قولداۋدىڭ قارجىلىق شارالارىن پايدالانۋ تيىمدىلىگىن ارتتىرۋ جولىمەن اوك ونىمدەرىن ءوندىرۋدىڭ تيىمدىلىگىن ارتتىرۋعا  – 39،5 ملرد تەڭگە، ىشكى ىستەر مينيسترلىگىنە – «تۇرعىن ءۇي قاتىناستارى تۋرالى» زاڭنىڭ نورمالارىن ىسكە اسىرۋ ماقساتىندا 2018 جىلدىڭ 1 قاڭتارىنان باستاپ اسكەري قىزمەتشىلەر مەن ولاردىڭ وتباسى مۇشەلەرىن تۇرعىن ۇيمەن قامتاماسىز ەتۋدىڭ جاڭا تەتىگىن ەنگىزۋگە بايلانىستى تۇرعىن ءۇي تولەمدەرىنە 10،0 ملرد. تەڭگە، قورعانىس مينيسترلىگىنە – 2018 جىلدىڭ 1 قاڭتارىنان باستاپ اسكەري قىزمەتشىلەر مەن ولاردىڭ وتباسى مۇشەلەرىن تۇرعىن ۇيمەن قامتاماسىز ەتۋدىڭ جاڭا تەتىگىن ەنگىزۋگە بايلانىستى تۇرعىن ءۇي تولەمدەرىنە 10،1 ملرد تەڭگە، ۇلتتىق ەكونوميكا مينيسترلىگىنە – جاڭا ميكروكاسىپورىندار قۇرۋ جانە جۇمىس ىستەپ تۇرعان بيزنەستى كەڭەيتۋ ءۇشىن شاعىن كاسىپكەرلىك سۋبەكتىلەرىنە ميكروكرەديتتەر بەرۋگە 12،4 ملرد تەڭگە بولىنەتىن بولادى.

جالپى وتىرىستا 2004 جىلعى 18 ماۋسىمداعى ۇقشۇ شەڭبەرىندە قۇپيا اقپاراتتىڭ ساقتالۋىن ءوزارا قامتاماسىز ەتۋگە بايلانىستى كەلىسىمگە وزگەرىستەر تۋرالى زاڭ جوباسى ماقۇلداندى.

قۇجاتتا كەلىسىمگە قاتىسۋشىلار ورتاسىن كەڭەيتۋ مۇمكىندىگى قامتاماسىز ەتىلىپ وتىر. 

وسى كۇنى پارلامەنت ءماجىلىسى ۆەتنام سوسياليستىك رەسپۋبليكاسىمەن قىلمىستىق ىستەر بويىنشا ءوزارا قۇقىقتىق كومەك تۋرالى جانە ليتۆا رەسپۋبليكاسىمەن باس بوستاندىعىنان ايىرۋعا سوتتالعان ادامداردى جانە مەديسينالىق سيپاتتاعى ماجبۇرلەۋ شارالارى قولدانىلعان ادامداردى بەرۋ تۋرالى  شارتتاردى راتيفيكاسيالاۋعا قاتىستى زاڭ جوبالارىن جۇمىسقا قابىلدادى.