دارحان كالەتايەۆ ق ر ءدىن ىستەرى جانە ازاماتتىق قوعام ءمينيسترى بولىپ تاعايىندالعانىنا تۋرا 2 اپتا ءوتتى. ەكى اپتا ىشىندە ەكى مارتە ۇكىمەت وتىرىسىنا قاتىستى. ءبىراق، ازىرگە ۇكىمەت جيىنىندا بايانداما جاساپ ۇلگەرگەن جوق.

8 ءساۋىر. كالەتايەۆتىڭ تاعايىندالۋى پاسحا مەرەكەسىنە تاپ كەلدى. سوندىقتان، ءدىن ىستەرى جانە ازاماتتىق قوعام ءمينيسترى پراۆوسلاۆيە ءدىنى – قازاقستاندا دىنگە سەنۋشىلەرىنىڭ سانى بويىنشا يسلامنان كەيىنگى ەكىنشى ءدىني باعىت بولعاندىقتان، مينيستر رەتىندە العاشقى جۇمىسىن مەرەكە يەلەرىن قۇتتىقتاۋدان باستادى.

9 ءساۋىر. پاسحامەن قۇتتىقتاعان كۇننىڭ ەرتەسىندە-اق مينيستر دارحان كالەتايەۆ قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى ورازبەن كەزدەستى. كەزدەسۋ بارىسىندا ءدىن ىستەرى جانە ازاماتتىق قوعام مينيسترلىگى مەن قازاقستان مۇسىلماندارى ءدىني باسقارماسىنىڭ اراسىنداعى ىنتىماقتاستىق ماسەلەلەرى تالقىلانىپ، ءدىنارالىق كەلىسىمدى نىعايتۋ جانە ازاماتتاردىڭ ار-وجدان قۇقىقتارىن جۇزەگە اسىرۋ ماسەلەلەرى قارالدى.

11 ءساۋىر. قازاقستان كاسىپوداقتار فەدەراسياسىنىڭ ءتوراعاسى باقىتجان ابدىرايىممەن كەزدەستى. كەزدەسۋ بارىسىندا ازاماتتىق قوعام سالاسىنداعى ۋاكىلەتتى ورگاننىڭ جانە كاسىپوداق ۇيىمدارىنىڭ الەۋمەتتىك سەرىكتەستىكتى دامىتۋ بويىنشا ءوزارا ءىس-قيمىلدى نىعايتۋ ماسەلەلەرى تالقىلاندى.

13 ءساۋىر. ق ر مەملەكەتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەسىنىڭ ءححى كەڭەيتىلگەن وتىرىسىنا قاتىستى. وسى شارادان كەيىن شىمكەنتتىك جاس بەلسەندىلەرمەن كەزدەسۋ وتكىزىپ، جاستاردى پراگماتيزمگە شاقىردى.

18 ءساۋىر. ۇكىمەت وتىرىسىنان كەيىن جۋرناليستەرگە العاشقى جۇمىس كۇندەرى تۋرالى ايتىپ بەردى. ازىرگە ەشقانداي كادرلىق وزگەرىستەر جاساماعانىن، سونداي-اق، 10 جىلداي بۇل سالادان تىسقارى جۇرگەندە كوپ دۇنيەنىڭ وزگەرگەنىن، ۆەدومستۆو ۇجىمىنىڭ كاسىبيلىگىنە كوڭىلى تولاتىنىن، الداعى ەڭ ماڭىزدى جۇمىس رەتىندە ماجىلىسكە ەنگىزىلگەن ەكى زاڭ جوباسىن ايتتى.

دەرەككوز: kazpolit.kz