ق ر باس پروكۋراتۋراسى كۇشىنە ەنگەن ۇكىمدەردىڭ زاڭدىلىعىن جانە ولاردىڭ ورىندالۋىن قاداعالاۋ قىزمەتىنىڭ باسشىسى قايرات جاقىپبايەۆ "استانا ەكسپو-2017" باسقارما ەكس-توراعاسى تالعات ەرمەگيايەۆتىڭ كولونياداعى "جايلى جاعدايى" تۋرالى ايتىپ بەردى، - دەپ حابارلايدى Tengrinews.kz.
"ەرمەگيايەۆقا قاتىستى دەرەك بويىنشا، ول جەردە VIP-كامەرا دەگەن بولماعان، وندىرىستىك ايماقتا جۇمىس ۋاقىتىنا ارنالعان كابينەت جاساقتالعان. تۇندە ول كامەراسىندا جازاسىن وتەگەن، ال كۇندىز وعان كەي جەڭىلدىكتەر جاسالعان. بۇل دەرەككە قاتىستى قىلمىستىق ءىس قوزعالدى، تەرگەۋ ءجۇرىپ جاتىر، قىزمەتكەرلەر جۇمىسىنان بوساتىلدى. ىىم-دە اۋقىمدى تەكسەرىس جۇرگىزىلدى، 16 لاۋازىمدى تۇلعا جازالاندى، ەكەۋى جۇمىستان بوساتىلدى"، - دەيدى جاقىپبايەۆ ۆەدومستۆودا وتكەن باسپا ءسوز ءماسليحاتى كەزىندە.
ونىڭ سوزىنشە، تەرگەۋ قورىتىندىسىنا قاتىستى قازاقستان بويىنشا تەكسەرىس جۇرگىزىلدى.
"قاڭتاردا بارلىق مەكەمەنى تەكسەرۋدەن وتكىزدىك. بۇعان ۇقساس جاعداي بولعان جوق. دەگەنمەن كەي ادامداردان تەلەفون، تۇرمىستىق تەحنيكا، جيھاز سياقتى دۇنيەلەر تاركىلەندى. ءقازىر مۇندايدى باقىلۋدا ۇستاپ وتىرمىز، ارى قاراي دا تەكسەرىپ تۇرامىز"، - دەيدى ۆەدومستۆو وكىلى.
مۇنىڭ الدىندا ءىىم وكىلدەرى استانا ىرگەسىندەگى ەس-166/10 تۇزەۋ مەكەمەسىندە ەرمەگيايەۆقا جايلى جاعداي جاساعان لاۋازىمدى تۇلعالاردىڭ جازالانعانىن مالىمدەگەن.
ەسكە سالايىق، 2016 جىلدىڭ ماۋسىمىندا "استانا ەكسپو-2017" باسقارماسىنىڭ بۇرىنعى باسشىسى تالعات ەرمەگيايەۆ اسا ءىرى كولەمدە اقشا جىمقىرعانى ءۇشىن 14 جىلعا باس بوستاندىعىنان ايىرىلعان.
