بۇگىن ءماجىلىس ءتوراعاسى نۇرلان نىعماتۋلين رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكيندى قابىلدادى، دەپ حابارلايدى Qamshy.kz اقپارات اگەنتتىگى ءماجىلىستىڭ باسپا ءسوز قىزمەتىنە سىلتەمە جاساپ.

تاراپتار ەكىجاقتى، سونىڭ ىشىندە، پارلامەنتارالىق ىنتىماقتاستىقتى نىعايتۋدىڭ وزەكتى سۇراقتارىن تالقىلادى.

نۇرلان نىعماتۋلين اتاپ وتكەندەي، رەسەي قازاقستاننىڭ ستراتەگيالىق ارىپتەسى، سەنىمدى دوسى جانە تاتۋ كورشىسى. وتكەن جىلى قوس مەملەكەت اراسىندا ديپلوماتيالىق قاتىناستىڭ ورناعانىنا 25 جىل تولدى.

ءماجىلىس ءتوراعاسىنىڭ پىكىرىنشە، قازاقستان مەن رەسەي پرەزيدەنتتەرىنىڭ تەرەڭ تۇسىنىستىك پەن دوستىققا نەگىزدەلگەن ساليقالى ساياساتتارىنىڭ ارقاسىندا ءبىزدىڭ ەلدەرىمىز ءوزارا ارىپتەستىكتىڭ جوعارعى كورسەتكىشتەرىنە قول جەتكىزدى.

ماڭىزدى باعىتتار قاتارىندا ن. نىعماتۋلين ايماقارالىق جانە شەكاراارالىق ىنتىماقتاستىقتى، ەۋرازيالىق كەڭىستىكتە ينتەگراسيالىق بىرلەستىكتەر اياسىندا ءوزارا ءىس-قيمىلدى اتادى.

ءوز كەزەگىندە ا. بوروداۆكين قازاقستانمەن دوستىق قاتىناستى دامىتۋ زور ماڭىزعا يە ەكەنىن العا تارتىپ، ەكى ەل اراسىنداعى اۋقىمدى جەتىستىكتەرگە توقتالدى.

ەكى ەلدىڭ پارلامەنت وكىلدەرى تمد پاا اياسىندا ۇلتتىق زاڭنامالاردى ۇيلەستىرۋ بويىنشا تابىستى ەڭبەك ەتىپ، ەۋرازەو زاڭنامالىق بازاسىن قالىپتاستىرۋدا بىرلەسە بەلسەندى جۇمىس ىستەۋدە.

ءماجىلىس ءتوراعاسى ەلشىنى جاڭا قىزمەتكە تاعايىندالۋىمەن قۇتتىقتاي كەلىپ، ا. بوروداۆكيننىڭ ديپلوماتيالىق جۇمىستاعى مول تاجىريبەسى ءبىزدىڭ ەلدەرىمىز اراسىنداعى بايلانىستى جان-جاقتى تەرەڭدەتۋگە ىقپال ەتەتىنىنە سەنىم ءبىلدىردى.