اقش پرەزيدەنتى دونالد ترامپ پەن ونىڭ جارى مەلانيا سەيسەنبىدە سالتاناتتى تۇردە فرانسيا پرەزيدەنتى ەممانۋەل ماكرون مەن ونىڭ ايەلى ءبريجيتتى ۆاشينگتوندا كۇتتى. مەلانيانىڭ بەتىنەن ءسۇيۋ بىردەن مۇمكىن بولمادى، ونىڭ تەلپەگى كەدەرگى بولدى دەپ جازادى Qamshy.kz اقپارات اگەنتتىگى tengrinews.kz سايتىنا سىلتەمە جاساپ.

كەزدەسۋ بارىسىندا اق ءۇي باسشىسى سوندا تۇرعان ادامدارعا فرانسۋز كوشباسشىسىنىڭ يىعىندا قايىزعاقتىڭ تۇرعانىن ايتىپ، كۇلە وتىرىپ ءسۇرتىپ تاستادى. 

«بارلىعى دا ءبىزدىڭ قارىم-قاتىناسىمىزدىڭ جاقسى ەكەنىن ايتادى، ول راس. بۇل جالعان جاڭالىق ەمەس. شىنىمەن دە بۇل وتىرىك ەمەس. ءسىزدىڭ وسىندا كەلۋىڭىز، ءبىز ءۇشىن ۇلكەن قۇرمەت. ال ءقازىر مەن مىنا كىشكەنتاي قايىزعاقتى ءسۇرتىپ تاستايىن... ءبىز ونى ءمىنسىز ەتۋىمىز كەرەك. ول كۇمانسىز. سونىمەن، سەنىمەن بىرگە بولۋ ۇلكەن قۇرمەت، سەن ەرەكشە دوسسىڭ. راقمەت»، - دەدى.  وسىدان كەيىن ترامپ ءداستۇرلى تۇردە ءوز ارىپتەسىمەن قول الىستى.

سونداي-اق جۋرناليستەر تاعى ءبىر ىڭعايسىز جاعدايدى بايقاپ قالدى. فوتوسسەسيا بارىسىندا دونالد ترامپ جارىنىڭ قولىنان ۇستايىن دەگەن، الايدا مەلانيا كۇيەۋىمەن قول ۇستاسۋدان باس تارتقان.