پاۆلودار وبلىسىندا تۇرعىندار ەرتىس وزەنىنىڭ جاعاسىنان 300 جىلدىق ادام باسىنىڭ قاڭقاسىن تاۋىپ الدى، دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساي وتىرىپ.

كۋاگەرلەر قاڭقا تابىلعان جەردىڭ سۋرەتتەرىن الەۋمەتتىك جەلىلەردە ءبولىستى. اققۋ اۋىلىنىڭ تۇرعىنىنىڭ ايتۋىنشا، باس قاڭقاسىنان دا بولەك ول جەردە سۇيەكتەردىڭ بولىكتەرى دە جاتقان.

اۋىل اكىمدىگى مالىمدەگەندەي، تابىلعان ادام قاڭقاسى 18 عاسىردا كومىلگەن. قاڭقا تابىلعان جەرگە جاقىن ماڭدا ەسكى پراۆوسلاۆتىق زيراتتار ورنالاسقان ەكەن.

«بىزدە 300 جىل بۇرىن كومىلگەن ادامنىڭ قاڭقاسى بار. جىل سايىن وزەن جاعاسىن سۋ شايىپ ءوتىپ، سالدارىنان ادامداردىڭ قاڭقاسى جاعاعا شىعىپ قالادى. ءقازىر جاعالاۋعا جاقىنداپ بارۋ مۇمكىن ەمەس، سۋ دەڭگەيى وتە جوعارى كوتەرىلىپ كەتكەن، جارتاستاردىڭ قۇلاپ كەتۋ ءقاۋىپى بار. سۋ دەڭگەيى تومەندەگەننەن كەيىن تابىلعان ادام قاڭقالارىن جيناپ، قايتادان كومىپ تاستايمىز»، - دەدى لەبياجينسك اۋىلدىق وكرۋگىنىڭ اكىمى ە.بالتابايەۆ.

ونىڭ ايتۋىنشا، تابىلعان ادام باسىنىڭ قاڭقاسى مەن سۇيەكتەرىن اققۋ اۋىلىنداعى زيراتتاردىڭ بىرىنە كومەدى ەكەن.

«بىزدە كونە ادام قاڭقالارىن قايتادان كومەتىن زيرات بار. ول تولىعىمەن قورشالعان، ادام قاڭقالارىن قايتادان كومۋگە ازداعان ورىن بار. جىل سايىن مۇنداي جۇمىستاردى اتقارىپ وتىرامىز، جاعداي ۇنەمى باقىلاۋدا. 2015 جىلى ەسكى زيراتتىڭ ورنىندا ارحەولوگتار جۇمىس ىستەگەن. بۇل زيرات 18 عاسىردا پايدا بولعان دەگەن بولجام بار»، - دەپ اتاپ ءوتتى اكىم.

اققۋ اۋىلىنىڭ تۇرعىندارى سوڭعى رەت ادام قاڭقالارىن 2016 جىلى تاۋىپ العان. اكىمدىكتىڭ مالىمەتىنشە، ول كەزدە بەس ادام جەرلەنگەن ورىندار تابىلعان. ايتا كەتەيىك، تۇرعىندار ادام قاڭقالارىن 1990 جىلدان تابا باستاعان. 2014 جىلدىڭ جازىنان باستاپ بۇل جەردە ادام قاڭقالارى مەن باس سۇيەگىنەن باسقا جەرلەنگەن ورىندار مەن اعاشتان كەسىلگەن پالۋبالار دا تابىلعان.