قازىرگى ەلىمىز رۋحاني جاڭعىرۋعا بەت العان كەزەڭدە ۇلتىمىزدىڭ تاريحى مەن مادەنيەتىن، ونەرى مەن ادەبيەتىن الەم جۇرتشىلىعىنا تانىستىرۋ، ۇزدىك شىعارمالاردى ناسيحاتتاۋ  ماڭىزدى مىندەتتەردىڭ ءبىرى.

ۇستىمىزدەگى جىلدىڭ 25 ءساۋىر جانە 1 ماي ارالىعىندا بىرىككەن اراب امىرلىكتەرىنىڭ استاناسى ابۋ-دابي قالاسىندا  2018 جىلعى ابۋ-دابي حالىقارالىق كىتاپ كورمەسى ءوتتى. بيىلعى جىلى كورمەگە 63 ەلدەن 1500 قاتىسۋشى قاتىستى. كورمەنىڭ اشىلۋىندا بىرىككەن اراب امىرلىكتەرى سىرتقى ىستەر ءمينيسترى شەيح ابدۋللا بەن زايەد ءال-ناحايان بيىلعى جىلدىڭ قۇرمەتتى قوناعى - پولشا ەلىنىڭ ستەندىن سالتاناتتى تۇردە اشتى. پولشا دەلەگاتتارى قۇرامىندا اۆتورلار، زيالى قاۋىم وكىلدەرى جانە سۋرەتشىلەر، مۋزىكانتتار، اسپازدار بولدى. ولار پولياك ادەبيەتىنىڭ التىن كلاسسيكاسى مەن نوبەل سىيلىعى لاۋرەاتتارىنىڭ شىعارمالارىن، سونداي-اق قازىرگى زامانعى شىعارمالار، ادەبي شىعارمالار ارقىلى پولياك مادەنيەتىن، ءداستۇرىن، وتكەن كەزەڭىن جانە قازىرگى ديناميكالىق دامۋىن اراب حالقىنا جان-جاقتىلى تانىستىردى. كاسىبي باعدارلاما كەزىندە پولياك كىتاپتار نارىعى مەن اۋدارما، اۆتورلىق قۇقىقتاردى باسقارۋ ءسوز بولدى. بالالارعا ارنالعان ءىس-شارالارعا پولياك ارتىستەرى مەن ۇستازدارى ونەر كورسەتتى، اسپازشىلار ۇلتتىق تاعامدارىنىڭ تاريحىن ءتۇسىندىردى.

اتالمىش كورمەگە قازاقستان رەسپۋبليكاسىنىڭ ۇلتتىق كىتاپحاناسى، باسپاگەرلەر، پوليگرافيستەر جانە كىتاپ تاراتۋشىلار قاۋىمداستىعىنىڭ ۇيىمداستىرۋىمەن قازاقستاندىق ءبىر توپ باسپا ءىسىنىڭ ماماندارى قاتىستى.

قازاقستاندىق دەلەگاسيا قۇرامىندا «ءداۋىر» رپبك ديرەكتورى سۆەتلانا نازاربايەۆا،  كوممەرسيالىق ديرەكتورى  بالجان راكيشيەۆا، ق ر ۇلتتىق كىتاپحاناسى سىرتقى بايلانىستار جانە فراندرايزينگ توبىنىڭ جەتەكشىسى، بپكا جوبالار بويىنشا ديرەكتورى بايان قابىلاش، «قازاق ەنسيكلوپەدياسى» باسپاسىنىڭ ديرەكتورى جادىرا تويبايەۆا، «By production» ديرەكتورى مارجان ءسادۋاقاسوۆا، اۋدارماشى پەريزات قايرات، ت.ب. قاتىستى. قازاقستان ستەندىندە قازاق، اعىلشىن، اراب تىلدەرىندە 200-گە جۋىق باسىلىم كورمە قاتىسۋشىلارىنىڭ نازارىنا ۇسىنىلدى. وندا كوركەم ادەبيەتتەرمەن قاتار بالالارعا ارنالعان كىتاپتار، وقۋلىقتار، قۇجاتتامالىق-دەرەكتى باسىلىمدار بار.

كورمەنىڭ ءبىرىنشى كۇنى، ابۋ-دابي مادەنيەت جانە تۋريزم باسقارماسىنىڭ ارنايى شاقىرۋىمەن «ءداۋىر» رەسپۋبليكالىق باسپا پوليگرافيا كەشەنىنىڭ ديرەكتورى سۆەتلانا نازاربايەۆا كاسىبي باعدارلاماعا قاتىسىپ، «مادەنيەت. كىتاپ ءىسى: قازاقستانداعى تۇراقتى دامۋ جولىنداعى قوزعالىس» اتتى بايانداما جاسادى. بايانداماعا ەلشىلەر، ديپلوماتتار، اراب ەلىنىڭ زيالى قاۋىم وكىلدەرى قاتىسىپ، قازاقستاننىڭ مادەنيەتى، تابيعاتى، ءسالت-داستۇرى جانە باسپا سالاسىنىڭ تاريحى مەن جەتىستىكتەرى تۋرالى تولىق ماعلۇمات الدى.

بۇل شاراعا قازاقستاننىڭ بىرىككەن اراب امىرلىكتەرىندەگى ەلشىسى قايرات لاما شاريف مىرزا تىكەلەي قولداۋ ءبىلدىرىپ، كورمەنىڭ ءساتتى وتۋىنە بارلىق جاعدايدى جاسادى. بۇل كىتاپ كورمەسى قازاقستان مەن ءباا اراسىنداعى مادەني، رۋحاني بايلانىستاردى نىعايتۋ باعىتىنداعى ناقتى قادامداردىڭ ءبىرى بولدى دەي الامىز.

 30 ءساۋىر كۇنى شەيح زايەد كىتابىنىڭ جەڭىمپازدارى رەسمي مەدالدارمەن ماراپاتتالدى. سالتاناتتى ءراسىم Saadiyat ارالدارىنداعى مادەني كەڭىستىكتەگى «ءمانارات-ال-سااديي» كورمەسىندە ءوتتى، وندا لۋۆر ءابۋ-دابي جانە زايەد ۇلتتىق مۇراجايى ورنالاسقان. ابۋ-دابي تۋريزم جانە مادەنيەت باسقارماسىنىڭ كەڭەسشىسى سايف سايد گوباش قاتىسۋشىلارعا شەيح زايەد كىتابى ماراپاتى ماقساتىنىڭ مادەني كوپىردى قالىپتاستىرۋ ەكەندىگىنە توقتالدى. ول ءباا-نىڭ دىنىنە نەمەسە تۇسىنە قاراماي، ادامزاتتى بايلانىستىرۋداعى جۇمىسىن ماقتان تۇتاتىنىن اتاپ ايتتى. شەيح زايەد كىتابى ماراپاتىنىڭ باس حاتشىسى دوكتور الي بين تاميم، شەيح زايەد بەن سۇلتان ءال ناحاياندى ەسكە الىپ، شەيح زايەدتىڭ ولەڭدەرىنەن، سوزدەرىنەن ۇزىندىلەر كەلتىردى، جىلى لەبىزدەرىن ءبىلدىردى. بىرىككەن اراب امىرلىكتەرى پرەمەر-مينيسترىنىڭ ورىنباسارى، پرەزيدەنت ىستەرى جونىندەگى ءمينيسترى           شەيح مانسۇر بەن زايەد ءال-ناحايان 2018 جىلدىڭ جەڭىمپازدارىنىڭ سىيلىعىن ۇسىندى. ءاربىر جەڭىمپاز 750 000 ديرحام (204 000 اقش دوللارى) سىيلىعىنا يە بولادى، ال «جىلدىڭ مادەني ادامدارى» نوميناسياسىنىڭ جەڭىمپازى 1 ميلليون ديرحام (272 مىڭ اقش دوللارى) الادى. 2018 جىلى زايەدتىڭ 100 جىلدىق مەرەيتويىن اتاپ ءوتۋ ءۇشىن باا-دەگى زايەد جىلى دەپ بەلگىلەندى.

قازاقستان رەسپۋبليكاسى ۇلتتىق كىتاپحاناسىنىڭ سىرتقى بايلانىستار جانە فاندرايزينگ توبىنىڭ توپ جەتەكشىسى بايان كابىلاش  2018 جىلعى «شەيح زايەد» كىتابى ماراپاتتاۋىنىڭ «بالالار ادەبيەتى» نوميناسياسى بويىنشا لاۋرەاتى حەسسا ءال مەحايري حانىممەن

مىنە، وسى ايتىلعانداردى تۇيىندەي كەلە، مۇنداي ءىس-شارالار قازاقستان رەسپۋبيكاسى مەن بىرىككەن اراب امىرلىكتەرى اراسىنداعى مادەني، رۋحاني بايلانىستاردىڭ جاڭا كەزەڭىنە قادام باسقاندىعىن اڭعارتادى دەي الامىز.