قازاقستاندىق كاسىپقوي بوكسشى، ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى گەنناديي گولوۆكين مەن امەريكالىق بوكسشى ۆانەس مارتيروسيان سالماق ولشەۋ راسىمىنەن ءوتتى، دەپ جازادى Qamshy.kz اقپارات اگەنتتىگى.

گەنانىڭ سالماعى 160 فۋنت بولسا، ۆانەس 159،6 فۋنت بولدى. ياعني قازاقستاندىق بوكسشى 72،574 كگ، امەريكالىقتىڭ سالماعى 72،393 كگ-دى تارتتى. سالماق ايىرماشىلىعى 181 گرامم عانا. ورتا سالماقتاعى بوكسشىلار شەكتەۋى 160 فۋنت بولىپ سانالادى.

ەرتەڭ، 6 مامىر كۇنى تاڭدا قوس بوكسشىنىڭ اراسىنداعى كەزدەسۋ وتەدى.

GGG بۇل كەزدەسۋدەن 1 ميلليون دوللار كولەمىندە سىياقى السا، ۆانەس مارتيروسيان 225 مىڭ دوللار تابىسقا كەنەلەدى. ال جەكپە-جەكتەن تۇسەتىن قارجى بۇل تابىسقا كىرمەيدى. ونى بوكسشىلار بولەك الاتىن بولادى.

ۆانەس مارتيروسيان تەگى ارمەنيالىق بوكسشى. ول 4 جاسقا تولعاندا وتباسى اقش-قا قونىس اۋدارعان. ال بوكسپەن 7 جاسىنان باستاپ شۇعىلدانا باستاعان. اكەسىنىڭ ءوزى اۋەسقوي بوكسشى بولعان. ۇلىنىڭ دا بوكستا بيىك بەلەستەردى باعىندىرعانىن قالاعان.

ول كاسىپقوي بوكستاعى بارلىق جەكپە-جەكتەرىن ءبىرىنشى ورتا سالماقتا وتكىزگەن. 33 جەكپە-جەكتە قاتارىنان جەڭىسكە جەتكەن. 2012 جىلى كۋبالىق ەريسلاندي لارامەن تەڭ تۇسەدى. اراعا ءبىر جىل سالا امەريكالىق بوكسشى دەمەتريۋس اندرادەگە ۇپاي ايىرماسىمەن جول بەرىپ، العاش رەت جەڭىلەدى.

2015 جىلى وتانداسى دجەرمەلل چارلودان جەڭىلگەن. 2016 جىلى كۋبالىق ەريسلاندي لاراعا قارسى كەزدەسۋ وتكىزىپ، ۇپاي ايىرماسىمەن ۇتىلعان. ودان بەرگى 2 جىل ىشىندە شارشى الاڭعا شىقپاعان.

امەريكالىق بوكسشى 20 جەكپە-جەگىندە قارسىلاسىن نوكاۋتپەن ۇتقان. ال بۇل ناتيجەسىن گەنناديي گولوۆكينمەن سالىستىرۋعا كەلمەيدى. وتانداسىمىز 38 جەكپە-جەك وتكىزىپ، تەك ساۋل الۆارەسكە قارسى كەزدەسۋىندە عانا تەڭ ءتۇستى. 33 جەكپە-جەگىندە قارسىلاسىن نوكاۋتپەن ۇتقان.

ايتا كەتەيىك، گولوۆكين مەن مارتيروسيان اراسىنداعى كەزدەسۋ اقش ۋاقىتىمەن 5 مامىر كۇنى كارسون قالاسىندا (كاليفورنيا شتاتى) StubHub سپورت كەشەنىندە وتەدى. استانادا ۋاقىتىمەن جەكپە-جەك 6 مامىر كۇنى شامامەن 9:00-دە باستالادى. 

قازىرگى ۋاقىتتا بۇل كەزدەسۋدى بىردە ءبىر قازاقستاندىق تەلەارنالار گولوۆكين مەن مارتيروسيان اراسىنداعى كەزدەسۋدى كورسەتەتىنىن حابارلامادى. بۇعان دەيىن گولوۆكيننىڭ كەزدەسۋىن QazSport جانە Qazaqstan ارنالارى تىكەلەي ەفيردەن كورسەتكەن بولاتىن. 

تىكەلەي ەفيردە بۇل كەزدەسۋدى HBO، "ماچ تۆ"، "ماچ! بوەس" جانە BoxNation ارنالارى تىكەلەي ەفيردە كورسەتەدى. 

كەزدەسۋدىڭ تىكەلەي ەفيرىنىڭ سىلتەمەسى جەكپە-جەك باستالارعا دەيىن شىعادى. سىلتەمەلەر جەكپە-جەك كەزىندە دە شىعاتىنىنا نازار اۋدارۋلارىڭىزدى سۇرايمىن. سونىمەن قاتار سىزدەر دە جەكپە-جەكتىڭ سىلتەمەسىن پىكىر رەتىندە قالدىرا الاسىزدار.