شىعىس قازاقستان وبلىسىندا باۋىرىن قورعايمىن دەپ ەكى ادامعا وق اتقان پوليسەيگە قاتىستى سوت ۇكىمى شىقتى. بۇل تۋرالى جەرگىلىكتى altaynews.kz پورتالى حابارلدى.

ايتا كەتەيىك، بۇل وقيعا ءساۋىردىڭ باسىندا كاتونقاراعاي اۋدانىنىڭ ۇلكەن نارىن اۋىلىندا ورىن العان. وق اتقان ەكى ادامنىڭ ءبىرى اۋىر جاراقاتتالىپ، ەكىنشىسى كوز جۇمعان بولاتىن. بۇعان دەيىن ادام ولىمىنە قاتىستى سوت ءىسى قارالىپ، ۇكىم شىعارىلىپ قويعان.

2 ساۋىردە مارات م. قىزمەتىنە كىرىسكەن ەدى. كۇندىز باۋىرى حابارلاسىپ، بىرنەشە ەر ادام جابىلىپ، ونى سوققىعا جىققانىن ايتادى. ولاردىڭ ءبىرى ءقازىر تەحنيكالىق بايقاۋ ستانساسىندا جۇرگەنىن ەستىگەن مارات م. باۋىرىن ەرتىپ، تابەلدى  «ماكاروۆ» قارۋىن الىپ، جەكە كولىگىمەن مەجەلى جەرگە بارادى.

وقيعا ورنىندا ەكى جاقتىڭ اراسىندا جانجال تۋادى. قارسىلاستارىنا تويتارىس بەرەمىن دەگەن ويمەن مارات م. اۋاعا وق اتقان. ال بۇل ارەكەتكە جاۋاپ رەتىندە قارسىلاستارىنىڭ ءبىرى اڭشىلىق شولاق مىلتىقتى ونىڭ باۋىرىنا كەزەيدى. ەندىگى كەزەكتە مارات م. قارۋلى ءجابىرشىنىڭ وزبىرلىعىن تۋرا اتىلعان وقپەن توقتاتادى. دەگەنمەن، جارالانعان ەر ادام پوليسەيدىڭ باۋىرىن دا اياعىنان جاراقاتتاپ ۇلگەرىپتى.

سوتتا قارالعان ماتەريالدار بويىنشا مارات م. قىلمىستىق كودەكستىڭ 112-بابىنىڭ 1 ءبولىمى (قاجەتتi قورعانىس شەگiنەن شىعۋ كەزiندە جاسالعان، دەنساۋلىققا قاساقانا اۋىر زيان كەلتiرۋ) بويىنشا كىنالى دەپ تابىلىپ، بۇرىن تاعايىندالعان جازاعا قوسىمشا سەگىز اي قوسىلىپ وتىر. شقو قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىن ەسەپكە العاندا، بارلىعى 15 جىل جانە 7 اي باس بوستاندىعىنان ايىرۋ جازاسى تاعايىندالدى.

زاڭدى بەلدەن باسقان پوليسيا قىزمەتكەرى جازاسىن قىلمىستىق اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەيتىن بولادى. سونداي-اق، سوت جابىرلەۋشىدەن جابىرلەنۋشىگە اينالعان ەر ادامنىڭ پايداسىنا 500 000 تەڭگە كولەمىندە مورالدىق زالالدى ءوندىرۋ تۋرالى شەشىم قابىلدادى.