وتان قورعاۋشى كۇنىنە وراي ق ر قك جوعارعى باس قولباسشىسى نۇرسۇلتان نازاربايەۆ جامبىل وبلىسىنداعى «وتار» اسكەري بازاسىنىڭ اۋماعىندا جاۋىنگەرلىك پارادقا قاتىستى. بارلىق وبلىستىڭ اكىمدەرى پارادقا كەلدى، دەپ جازادى Qamshy.kz اقپارات اگەنتتىگى. 

نۇرسۇلتان نازاربايەۆ پارادتىڭ شىمىلدىعىن اشتى. ەلباسى قازاقستاندىقتاردى وتان قورعاۋشى كۇنىمەن قۇتتىقتادى.

«قىمباتتى قازاقستاندىقتار، ساردارلار مەن ساربازدار! ءقادىرلى ارداگەرلەر! بارشاڭىزدى وتان قورعاۋشى كۇنى مەرەكەسىمەن شىن جۇرەكتەن قۇتتىقتايمىن. ءباھادۇر بابالار ۇلى دالامىزدى اق بىلەكتىڭ كۇشىمەن، اق نايزانىڭ ۇشىمەن قورعاپ، بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ، تاۋەلسىزدىكتىڭ قورعانى بولۋ مارتەبەلى زور مىندەت. جاۋجۇرەك جاۋىنگەرلەردىڭ كوتەرەتىن جۇگى اۋىر. ءبىراق ول ابىرويلى بورىش، قاستەرلى پارىز. قارۋلى كۇشتەرىمىز – حالقىمىزدىڭ سەنىمدى تىرەگى، مەملەكەتتىڭ بەرىك قالقانى»، - دەدى نۇرسۇلتان نازاربايەۆ.

جاۋىنگەرلىك پارادقا 300-دەن استام اسكەري تەحنيكا، 40-قا جۋىق اۆياسيا تەحنيكاسى تارتىلدى. ارميالىق بولىمشەلەر اسكەري تەحنيكانىڭ زاماناۋي ۇلگىلەرىن ءىس جۇزىندە قولدانۋ تاسىلدەرىن كورسەتتى.

پارادتا ءسوز العان ەلباسى قازاقستان بارلىعىنا دايىن بولۋ كەرەكتىگىن اتاپ ءوتتى.

«قازاقستان تونگەن ءقاۋىپتىڭ بەتىن قايتارۋ ءۇشىن دايىن بولۋ كەرەك. مەملەكەت ارميامىزدىڭ نىعايۋى الەۋەتىنە بارىنشا قولداۋ جاساۋدا مەن ەرەكشە نازار اۋدارۋدا. جۇيەلى تۇردە سوڭعى بۋىندى قارۋ مەن اسكەري تەحنيكا ۇلگىلەرىن ساتىپ الۋ جۇرگىزىلۋدە. سونداي-اق ءبىرقاتار ماڭىزدى جاۋىنگەرلىك تەحنيكا مەن قۇرالدار ءتۇرىن ءوندىرۋ تابىستى يگەرىلدى. اسكەري باسقارۋ جۇيەسى جاڭعىرتىلۋدا. ءبىزدىڭ ماقسات - قازىرگى زامانعى، ءموبيلدى، جوعارى كاسىبي بىلىكتى ارميانى قۇرۋ»، - دەدى نۇرسۇلتان نازاربايەۆ.

ايتا كەتەيىك، بۇعان دەيىن جاۋىنگەرلىك پاراد 2013 جىلى وتكەن.