الماتىدا قازاق قىزىن ءتورت جىل سەكس-قۇلدىقتا ۇستاعاندار قاماۋعا الىندى، دەپ حابارلايدى Qamshy.kz اقپارات اگەنتتىگى الماتى ءىىد دەپارتامەنتىنىڭ باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، 6 مامىردا ساعات شامامەن 18.00-دە الماتى قالاسىنداعى ءسۇيىنباي داڭعىلىندا اۆتوكولىك 1989 جىلى تۋعان ن. دەگەن ازاماتشانى قاعىپ كەتكەن، كەيىن ول بىرەۋلەردىڭ ونى زاڭسىز ۇستاپ، جەزوكشەلىكپەن اينالىسۋعا ماجبۇرلەگەندەرىن ايتتى.

"ن. دەگەن ازاماتشانىڭ ارىزى سوتقا دەيىنگى تەرگەۋدىڭ ءبىرىڭعاي رەەسترىنە ق ر قك 308-بابى بويىنشا تىركەلدى. كۇدىكتىلەر ۇستالىپ، ىىد-گە جەتكىزىلدى. قازىرگى تاڭدا الماتى ءىىد قتقب قىزمەتكەرلەرى وقيعانىڭ ناقتى ءمان-جايى مەن بەرىلگەن مالىمەتتەردىڭ راستىعىن انىقتاۋ ءۇشىن جەدەل ءارى تەرگەۋدىڭ كەشەندى شارالارىن جۇرگىزىپ جاتىر"، - دەلىنگەن حابارلامادا.

سونىمەن قاتار ن. دەگەن ازاماتشانىڭ 2009 جىلدان بەرى جەزوكشەلىكپەن اينالىسقان تۇلعا رەتىندە ۇيىمداسقان قىلمىسپەن كۇرەس باسقارماسىنىڭ قىلمىستىق ەسەبىندە تۇرعانى انىقتالدى. سونداي-اق، ونىڭ جەزوكشەلىكپەن اينالىساتىنداردى جانە ولارعا قىزمەت ەتەتىن پريتوندار مەن ورىنداردى انىقتاپ، جويۋ ماقساتىندا جۇرگىزىلگەن جەدەل-پروفيلاكتيكالىق شارالار مەن رەيدتەردىڭ ناتيجەسىندە ىشكى ىستەر ورگاندارىنا جەتكىزىلگەنى بەلگىلى بولدى.