10 مامىردا ورتالىق كوممۋنيكاسيالار الاڭىندا باسپا ءسوز، راديو جانە ينتەرنەت-جۋرناليستيكا سالاسىنداعى «ۇركەر» ۇلتتىق سىيلىعىنا ارنالعان بريفينگ ءوتتى. بريفينگكە قازاقستان رەسپۋبليكاسى اقپارات جانە كوممۋنيكاسيالار ۆيسە-مينيسترى ن.و. ماۋبەرلينوۆا، «Qazcontent» اق ءتوراعاسى ە.د. كوچەتوۆ، «Qazcontent» اق ءتوراعاسىنىڭ ورىنباسارى د.ب. ءالجانوۆ، «اتامەكەن» قازاقستان رەسپۋبليكاسىنىڭ ۇلتتىق كاسىپكەرلەر پالاتاسى پرەزيديۋمى جانىنداعى ءبىلىم بەرۋ جۇيەسىندەگى اقپاراتتىق-كوممۋنيكاسيالىق تەحنولوگيالار كوميتەتىنىڭ ءتوراعاسى م. ابەنوۆ قاتىستى جانە جۋرناليست م.ەسەن.
جيىن بارىسىندا نۇرگۇل ماۋبەرلينوۆا وتىنىشتەردى قابىلداۋ ەرەجەسى مەن بايقاۋعا كەلىپ تۇسكەن شىعارماشىلىق جۇمىستار قالاي ىرىكتەلەتىنىن ايتتى. وسى جىلى بايقاۋ 12 نوميناسيا بويىنشا وتەدى جانە تاعى ءبىر ەكپەريمەنتتىك نوميناسيا قوسىلىپ وتىر.
«نوميناسيالار تۋرالى كوپ ويلاندىق. ەڭ ۇزدىك بلوگرەلەر مەن ۆاينەرلەردى سونداي-اق ەڭ تانىمال پابليك پەن جىل حايپىن انىقتاساق دەگەن وي بار. ءادىل بولسىن دەگەن نيەتپەن وقىرماندار وزدەرى تاڭداسىن دەگەن شەشىمگە كەلدىك. سول سەبەپتى قوسىمشا قانداي نوميناسيا بولاتىنىن داۋىس بەرۋ ارقىلى انىقتاماقپىز. مۇنىڭ ەشقانداي قيىندىعى جوق، تەك el.kz سايتىنا كىرىپ، قاي نوميناسيانى قولدايتىنىڭىزدى داۋىس بەرۋ ارقىلى تاڭداي الاسىز»، - دەدى ەۆگەنيي كوچەتوۆ.
ۇلتتىق «ۇركەر» بايقاۋىنا قاتىسۋ ءۇشىن el.kz. سايتىنا تومەندەگى نوميناسيالار بويىنشا وتىنىشتەر جىبەرە الاسىزدار:
- ۇزدىك فوتوسۋرەت؛
- ۇزدىك رەپورتاج؛
- ۇزدىك ساراپتامالىق ماتەريال؛
- ۇزدىك جۋرناليستىك زەرتتەۋ؛
- ۇزدىك سۇحبات؛
- قازاقستان تۋرالى ۇزدىك تانىمدىق ماتەريال؛
- ۇزدىك حالىقارالىق تالدامالى ماتەريال؛
- ۇزدىك وڭىرلىك راديوستانسا؛
- ۇزدىك وڭىرلىك مەرزىمدى باسىلىم؛
- ۇزدىك قازاقستاندىق راديوستانسيا
- ۇزدىك ينتەرنەت-باسىلىم
- ۇزدىك رەسپۋبليكالىق مەرزىمدى باسىلىم
قازىلار القاسى قۇرامىنا تانىمال قوعام قايراتكەرلەرى مەن شىعارماشىلىق ينتەلليگەنسيا وكىلدەرى، جۋرناليستيكا سالاسىنىڭ مايتالمان ماماندارى كىرەدى. بايقاۋدىڭ لاۋرەاتى اتانعان جۋرناليستەرگە ەستەلىك ءمۇسىن مەن قارجىلاي جۇلدەلەر تابىستالادى. ءاربىر جەڭىمپاز 1 000 000 تەڭگە كولەمىندە اقشالاي سىيلىق پەن ءداستۇرلى ەستەلىك مۇسىنگە يە بولادى.
باسپا ءسوز، راديو جانە ينتەرنەت-جۋرناليستيكا سالاسىنداعى «ۇركەر» ۇلتتىق سىيلىعى بىلتىر العاش رەت ق ر اقپارات جانە كوممۋنيكاسيالار مينيسترلىگىنىڭ باستاماسىمەن وتكەن بولاتىن. ۇلتتىق سىيلىقتى ۇيىمداستىرۋشى «Qazcontent» اق.
ۇلتتىق پرەميا باسپا ءسوز، راديو جانە ينتەرنەت-جۋرناليستيكا سالاسىنداعى ۇزدىك جەتىستىگى ءۇشىن بەرىلەدى، بۇل ماراپات وڭىرلەردە مۋلتيمەديالىق جۋرناليستيكانى دامىتۋعا، جۋرناليستەردىڭ بەدەلىن ارتتىرۋعا، جۋرناليستيكانى ناسيحاتتان ەرەكشەلەيتىن كاسىبي ستاندارتتار مەن تالاپتاردى بەكىتۋگە، سونداي-اق قوعامنىڭ ازاماتتىق بەلسەندىلىگىن ارتتىرۋعا باعىتتالعان.
سىيلىقتىڭ نەگىزگى ماقساتى – تالانتتى جۋرناليستەر مەن ۇزدىك شىعارماشىلىق ۇجىمداردى انىقتاۋ، ولاردىڭ كاسىبي جۋرناليستيكانى دامىتۋعا قوسقان ۇلەستەرىن سارالاۋ جانە شىعارماشىلىق ادامدارىنىڭ ەلەۋلى ەڭبەگىنە قوعام نازارىن اۋدارۋ.
بايقاۋعا شىعارماشىلىق جۇمىستارى 2017 جىلى جاريالانعان باسپا ءسوز رەداكسيالارى مەن ينتەرنەت-باق وكىلدەرى سونداي-اق راديوستانسيالاردىڭ جۋرناليستەرى قاتىسا الادى.
پىكىر قالدىرۋ