ەرتايەۆتا قازاقستاندىق بانكتەردى «جوق قىلاتىن» اقپارات بار

/uploads/thumbnail/20180510134822081_small.jpg

8 مامىردا رەسەيلىك ب ا ق جومارت ەرتايەۆتىڭ ۇستالعانىن حابارلادى، دەپ جازادى Qamshy.kz اقپارات اگەنتتىگى today.kz-كە سىلتەمە جاساپ.

قازاقستاندىق تا، رەسەيلىك تە تاراپ رەسمي تۇردە اقپاراتتى ازىرگە راستاعان جوق. بەيرەسمي اقپاراتقا سايكەس، ەرتايەۆ ءىرى كولەمدە الاياقتىق جاسادى دەپ ايىپتالىپ وتىر. ونىڭ ALMA Group-تەگى قىزمەتىمەن بايلانىسى بار جوعى ازىرشە بەلگىسىز.

جومارت ەرتايەۆ — قازاقستاننىڭ قارجى سالاسىندا تانىمال. ونىڭ ۇستالعانى راستالسا وتاندىق قارجى سەكتورى مەن وندا جۇرگەندەردىڭ جاعدايى قانداي بولماق؟ بۇل سۇراققا قارجى ساراپشىسى راسۋل رىسمامبەتوۆ پەن ەكونوميكالىق شولۋشى دەنيس كريۆوشەيەۆ جاۋاپ بەردى.

ەكى ساراپشى دا جومارت ەرتايەۆ بىرنەشە قازاقستاندىق بانكتەردى «جوق قىلاتىن» اقپارات بىلەدى دەگەن ويدا.

راسۋل رىسمامبەتوۆتىڭ ويىنشا، جومارت ەرتايەۆ وتاندىق بانك جۇيەسىنىڭ وسال تۇستارىنان حاباردار. سەبەبى ول 1990 جىلدارى قازاقستاندىق قارجى ۇيىمدارىمەن جۇمىس ىستەگەن.

«ول اكسيونەرلەردىڭ قالاي جۇمىس ىستەيتىنىن جاقسى بىلەدى. ونىڭ تۇتقىندالعانى قازاقستاننىڭ بانك جۇيەسىنە اسەر ەتپەيدى. دەسەك تە ەرتايەۆ اكسيونەرلەردىڭ جاقسى جانە جامان تۇستارىن جاقسى بىلەدى. ولاردىڭ كەيبىرىن ءتىپتى شەتەلدە جۇرگەن قازاقستاندىق بانكيرلەردىڭ ءوزى ەسكە الۋعا باتپايدى» دەدى راسۋل رىسمامبەتوۆ.

ساراپشى جومارت ەرتايەۆ پەن مارعۇلان سەيسەمبايەۆتىڭ اراسىندا بولعان داۋدى ەسكە الدى. ولار بىر-بىرىنە كومپراماتى بار ەكەنىن استارلاپ جەتكىزگەن.

"ناقتى نە بىلەتىنىن بىلمەيمىن، ءبىراق كەيبىر قازاقستاندىق بانكتەردى «جوق قىلا الاتىنداي» اقپارات بىلەدى دەپ ويلايمىن" دەيدى رىسمامبەتوۆ.

«جومارت ەرتايەۆ ناقتى قانداي كۇدىكپەن ۇستالعانىن بىلمەيمىن، ءبىراق ءتۇبى RBK مەن Qazaq بانكتەرمەن بايلانىستى. بۇل بانكتەردىڭ قۇجاتتارىندا ونىڭ قولى جوق، الايدا ول وسى بانكتەردىڭ اكسيونەرلەرىنىڭ بىرىنە كەڭەسشىسى بولعان. جومارت ەرتايەۆ كىنا ارتۋعا ىڭعايلى ادام. ول شەتەلدە تۇرادى، ونىڭ ەسىمى قازاقستاندىق باق-تا بانك توڭىرەگىندەگى داۋعا قاتىستى بىرنەشە مارتە اتالدى» دەيدى رىسمامبەتوۆ.