قازاقستان پرەزيدەنتىنىڭ ءدىني قىزمەت سالاسىنداعى مەملەكەتتىك ساياساتتى جۇرگىزۋ، مەملەكەتتىك جاستار ساياساتىن ىسكە اسىرۋ، سونداي-اق ۆولونتەرلەرمەن جانە ۇكىمەتتىك ەمەس ۇيىمدارمەن ءوزارا ءىس-قيمىل جۇرگىزۋ جونىندەگى تاپسىرمالارى مەن باستامالارىن جۇزەگە اسىرۋ تۋراسىندا ق ر ءدىن ىستەرى جانە ازاماتتىق قوعام مينيسترلىگى بەلسەندى جۇمىس اتقارىپ كەلەدى.
بۇگىن قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى دارحان كالەتايەۆ ۇلىبريتانيا جانە سولتۇستىك يرلانديا بىرىككەن كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى مايكل دجون گيففوردپەن كەزدەستى، دەپ حابارلايدى Qamshy.kz اقپارات اگەنتتىگى ءدىن جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.
كەزدەسۋ بارىسىندا ءدىن جانە ازاماتتىق قوعام سالاسىنداعى ەكىجاقتى ىنتىماقتاستىقتىڭ جاي-كۇيى، سونداي-اق، ۆۋلف ينستيتۋتى دەلەگاسياسىنىڭ قازاقستانعا ساپارىن ۇيىمداستىرۋ ماسەلەلەرى تالقىلاندى. بۇل ينستيتۋت يۋدەيلەر، حريستياندار جانە مۇسىلماندار اراسىنداعى قارىم-قاتىناستى اكادەميالىق زەرتتەۋمەن اينالىساتىن الەمدىك كوشباسشى ۇيىمداردىڭ قاتاتىنا كىرەدى.
اعىمداعى جىلدىڭ مامىر ايىنىڭ سوڭىنا قاراي اتالعان دەلەگاسيانىڭ ساپارى اياسىندا ءبىرقاتار ءىس-شارالار وتكىزۋ جوسپارلانعان، اتاپ ايتقاندا، مينيسترلىكتە كەزدەسۋ وتكىزۋ، ءدىني عيماراتتاردى ارالاۋ، سونداي-اق مادەنيەتتەر مەن دىندەردىڭ حالىقارالىق ورتالىعى جانە «ۆۋلف» ينستيتۋتى اراسىنداعى ىنتىماقتاستىق تۋرالى مەموراندۋمعا قول قويىلادى دەپ كۇتىلۋدە.
اڭگىمەلەسۋ كەزىندە دارحان كالەتايەۆ قازاقستان رەسپۋبليكاسى مەن ۇلىبريتانيا بىرىككەن كورولدىگىنىڭ اراسىندا تىعىز جانە سەنىمدى قارىم-قاتىناس قالىپتاسقانىن اتاپ ءوتتى.
د. كالەتايەۆ ەلىمىزدەگى ازاماتتىق قوعام ينستيتۋتتارىن دامىتۋ بارىسىمەن تانىستىرىپ، مەملەكەت پەن ءدىن اراسىنداعى ءوزارا ءىس-قيمىل مودەلىن قالىپتاستىرۋداعى شارالاردى باياندادى. اتاپ ايتقاندا، مينيستر 2017-2020 جىلدارعا ارنالعان ءدىن سالاسىنداعى مەملەكەتتىك ساياساتتىڭ تۇجىرىمداماسى قابىلدانعانىن، ونىڭ نەگىزىندە ءدىن سالاسىنداعى زاڭناماعا وزگەتۋلەر ەنگىزۋ بويىنشا قۇجاتتار پاكەتى ازىرلەنگەنىن اتاپ ءوتتى.
كەزدەسۋ سوڭىندا تاراپتار ءدىن جانە ازاماتتىق قوعام سالاسىنداعى ءوزارا ءىس-قيمىل جونىندە سىندارلى ىنتىماقتاستىقتى دامىتۋعا قىزىعۋشىلىق ءبىلدىردى.
