ورالدا كوز جۇمعان ايەلدىڭ قىزى بارلىق ءمان-جايدى ايتىپ بەردى. بۇل جايىندا Qamshy.kz اقپارات اگەنتتىگى «موي گورود» سايتىنا سىلتەمە جاساپ حابارلايدى.

بەلگىلى بولعانداي، قىزدىڭ اتا-اناسىنا ونىڭ بۇرىنعى كۇيەۋى وق اتقان ەكەن.

ناديا داۆلەتشينانىڭ ايتۋىنشا، كۇيەۋى رۋستام داۆلەتشينمەن بىرگە سەگىز جىلدان بەرى بىرگە تۇرمايدى ەكەن.

«ءبىز بىرگە تۇرماعانمەن، ارامىزدا ەش ارازدىق بولماي، بىر-بىرىمىزبەن جاقسى ايىرىلىسقان بولاتىنبىز. ۇيلەنگەننەن سوڭ ءبىر جىلدان كەيىن مەن ورالعا كەلىپ اتا-اناممەن بىرگە تۇردىم ، رۋستام اقسايدا ءوزىنىڭ اناسىمەن قالعان. ءبىزدىڭ يلدار ەسىمدى جەتى جاستاعى ءبىر ۇلىمىز بار. اكەسى مەن بالاسىنىڭ ارالاسىپ، سويلەسىپ تۇرۋىنا ەشقاشان دا كەدەرگى بولماعانمىن، ول بالاسىن ءار دەمالىستا الىپ كەتەتىن. ال سوڭعى دەمالىستا ول بالامدى ۇرلاپ كەتتى، ونى تەك ءۇش اپتادان كەيىن قايتارىپ الا الدىق. ءوزىنىڭ ارەكەتىن «مەكتەپتە بالاعا ءبارىبىر ەشنارسە دە ۇيرەتپەيدى» دەگەن سىلتاۋمەن ءتۇسىندىردى»، - دەيدى ناديا.

ول وتكەن تۇندە بارلىعى ادەتتەگى كۇندەر سەكىلدى ءوتىپ جاتقانىن ايتتى.

«ءبىز بارلىعىمىز ۇيدە جينالدىق. كەشكە قاراي ەسىكتى بىرەۋ قاعىپ، انام ەسىك اشۋعا كەتكەن. ول ءبىر اۋىز ءسوز ايتىپ ۇلگەرمەستەن اتىلعان وقتىڭ داۋىسى ەستىلدى. بارلىعىمىز ەسىككە قاراي جۇگىردىك، ال انام جەردە قانعا مالىنىپ جاتتى. مەنىڭ بۇرىنعى كۇيەۋىم قارۋدى اكەمە تاقاپ، ەكىنشى رەت اتتى. مەن بالامدى الىپ اجەتحاناعا تىعىلىپ قالدىم. وتە قورقىنىشتى بولدى، ەشكىمنىڭ داۋىسى ەستىلمەدى، ءبىراز ۋاقىتتان كەيىن سىرتقا شىعىپ قاراسام، اكەم جەردە اۋىر جاراقاتتانىپ جاتىر ەكەن، ونىڭ ىشكى اعزالارى سىرتقا اقتارىلىپ كەتكەن. سوعان قاراماستان اكەم ەسىكتى جاۋىپ ۇلگەرىپتى»، - دەپ كوزىنە جاس الا ايتادى ناديا.

«مەن قورىققانىمنان نە ىستەرىمدى بىلمەدىم، ەڭ الدىمەن جەدەل جاردەم مەن پوليسياعا حابارلاستىم. بالام قورىققانىنا دىرىلدەپ ارەڭ تۇردى. كورشىلەر مەنىڭ بۇرىنعى كۇيەۋىم وق اتقاننان كەيىن قارۋدى جەرگە قويىپ، بىرەۋمەن سويلەسىپ، سوسىن كەتىپ قالعانىن ايتتى. ول بالانى الىپ كەتۋگە كەلدى دەپ ويلادىم، سەبەبى ول تاستاپ كەتكەن سومكەنىڭ ىشىندە بالانىڭ كيىمدەرى مەن پىشاق جاتتى. نە سەبەپتى مۇنداي قادامعا بارعانىن تۇسىنبەدىم، كەشە عانا ءبىزدى سوتتىڭ شەشىمىمەن رەسمي تۇردە اجىراستىرعان ەدى جانە ول ءوزىمىزدىڭ ارامىزدا عانا بولدى، ال كۇيەۋىم سوت وتىرىسىنا كەلمەدى»، - دەيدى ناديا.

ونىڭ ايتۋىنشا، قىلمىسكەردى پوليسيا قىزمەتكەرلەرى بىرنەشە ۋاقىتتان كەيىن ۇستاپ العان.

«ونى بارىنشا قاتاڭ جازالانۋىن سۇرايمىن، ەشقاشان دا بوستاندىققا شىقپاسا ەكەن»، - دەيدى قىز.

ايتا كەتسەك، رۋستام داۆلەتشين ەش جەردە جۇمىس ىستەمەگەن جانە مۇگەدەكتەر تىزىمىندە بولعان.

ەستەرىڭىزگە سالا كەتەيىك، 10 مامىر كۇنى ساعات 20:00 شاماسىندا ورال قالاسى قۇرىلىسشىلار شاعىن اۋدانىنداعى كوپقاباتتى ۇيلەردىڭ بىرىندە اتىس بولعان ەدى. قىلمىسكەر ءوزىنىڭ بۇرىنعى ايەلىنىڭ اتا-اناسىنا وق اتىپ، ايەل ادام وقيعا ورنىندا كوز جۇمعان، ال 56 جاستاعى ەر ادام جەرگىلىكتى اۋرۋحاناعا اۋىر جاراقاتپەن جەتكىزىلگەن بولاتىن. وعان 6 ساعاتتىق وتا جاسالدى.