قازاقستان پرەزيدەنتىنىڭ بىرلەسكەن ۇلتتار ۇيىمىمەن سەرىكتەستىك قارىم-قاتىناستارىنىڭ دامۋىنا قوسقان جەكە ۇلەسىن ىلعي دا قولداپ، القاپ جۇرەتىن ەكس-باس حاتشىسى پان گي مۋن استانا ەكونوميكالىق فورۋمىنا كەلدى، - دەپ جازادى Qamshy.kz اقپارات اگەنتتىگى. فورۋم اياسىندا كونە دوستاردىڭ جەكە كەزدەسۋى ءوتتى.

– ءسىز قازاقستاندا بىرنەشە رەت بولدىڭىز. ءبىز يادرولىق قارۋسىزدانۋ باعدارلاماسى بويىنشا بىرلەسە جۇمىس ىستەدىك. 29 تامىز بۇكىل الەمدە يادرولىق سىناقتارعا قارسى ءىس-قيمىل كۇنى رەتىندە اتاپ وتىلەدى. سىزبەن جانە كورەيا رەسپۋبليكاسىمەن ارامىزدا وتە جاقسى دوستىق قارىم-قاتىناس قالىپتاستى، – دەدى مەملەكەت باسشىسى.

پان گي مۋن استانا ەكونوميكالىق فورۋمى جاھاندىق سىن-تەگەۋرىندەردى تالقىلاپ، ولاردى ەڭسەرۋ جولدارىن تابۋ ىسىندە ماڭىزدى ءرول اتقاراتىنىن ايتتى.

– قازاقستانعا جاڭا قىزمەتىمدە العاش رەت كەلىپ وتىرعانىما قۋانىشتىمىن. جاھاندىق كوپتەگەن پروبلەمالار بار، مەن ولاردى شەشۋ ءۇشىن قولداۋ كورسەتۋگە ءازىرمىن. استانا ەكونوميكالىق فورۋمى تەك قازىرگى وزەكتى تاقىرىپتاردى عانا ەمەس، سونداي-اق جاھاندىق دامۋدىڭ كەلەشەكتەگى ماسەلەلەرىن دە تالقىلاۋعا ارنالعان الاڭعا اينالىپ وتىر، – دەدى بواو ازيا فورۋمى كەڭەسىنىڭ ءتوراعاسى.

اڭگىمەلەسۋ بارىسىندا تاراپتار بواو ازيا فورۋمى مەن استانا ەكونوميكالىق فورۋمى اراسىنداعى ىنتىماقتاستىق ماسەلەلەرىن، سونداي-اق «جاسىل» تەحنولوگيالاردى دامىتۋ سالاسىندا، عىلىمي-يننوۆاسيا سەكتورى مەن ءبىلىم بەرۋ ىسىندە بايلانىستار ورناتۋدىڭ پەرسپەكتيۆالارىن تالقىلادى.

ايتا كەتەتىن بولساق، 2010 جىلى پان گي مۋن استاناعا كەلگەن ساپارىندا مەملەكەت باسشىسى نۇرسۇلتان نازاربايەۆ بەيبىتشىلىك، الەۋمەتتىك ادىلەتتىلىك جانە جاھاندىق دەڭگەيدەگى تۇراقتى دامۋ سالاسىندا سىڭىرگەن ايرىقشا ەڭبەگى ءۇشىن بۇۇ باس حاتشىسى پان گي ءمۋننىڭ 1-دارەجەلى «دوستىق» وردەنىمەن ماراپاتتالعانىن اتاپ ايتتى جانە وعان جوعارى ماراپاتتى تابىس ەتتى.