استانادا ەسكى الاڭنىڭ الدىندا پوليسيا قىزمەتكەرلەرى «جەر ساتىلماسىن» دەگەن جازۋى بار پلاكات ۇستاعان ءبىر ادامدى ۇستاپ اكەتكەن. پوليسيا ونىڭ بەيبىت جيىن وتكىزۋ تۋرالى زاڭ بۇزعانىن ايتتى.

استانادا بۇگىن قاۋىپسىزدىك شاراسى كۇشەيتىلگەن. ازاتتىق تىلشىلەرىنىڭ حابارلاۋىنشا، بەيبىتشىلىك كوشەسىن پوليسيا قىزمەتكەرلەرىنىڭ كولىكتەرى قورشاپ العان، ال وعان جاقىن ماڭدا جەدەل-جاردەم كولىگى مەن ۆيدەو باقىلاۋ ورناتىلعان ميكرواۆتوبۋس تۇر.

مۇنداي قاۋىپسىزدىك شارالارى شىمكەنتتە دە كۇشەيتىلدى. ازاتتىقتىڭ جەرگىلىكتى تىلشىلەرى مۇندا دا ەكى ادامنىڭ ۇستالعانىن حابارلايدى. ال جەرگىلىكتى اكىمدىكتەردىڭ ماڭىن پوليسيا تورۋىلداپ ءجۇر.

ايتا كەتەيىك، مامىردىڭ 10-ىندا استانالىق بەلسەندىلەر ماقسات ءىلياس ۇلى، ىڭكار تيشتىبايەۆا، راۋشان توربايەۆ جانە ءابدۋالى تاعاي 21 مامىردا جەردىڭ ساتىلۋىنا قارسى بەيبىت ميتينگ وتكىزۋ تۋرالى جەرگىلىكتى بيلىككە ءوتىنىش بەرگەن. ولار 2016 جىلعى «جەر شەرۋلەرىنە» تۇرتكى بولعان نەگىزگى ماسەلە – اۋىلشارۋاشىلىعى ماقساتىنداعى جەردى شەتەلدىكتەرگە ساتپاۋ جانە ۇزاق مەرزىمگە جالعا بەرمەۋ تۋرالى جۇرتشىلىقتىڭ بيلىككە قويعان تالاپتارى ورىندالماي، بيىل ساۋىردە پارلامەنت ماقۇلداعان جەر تۋرالى زاڭ جوباسىندا داۋلى نورمالاردىڭ وزگەرىسسىز قالعانىنا نارازى ەكەندەرىن ايتقان. ال استانا اكىمدىگى وتكەن اپتادا بەلسەندىلەرگە بەيبىت ميتينگ وتكىزۋگە رۇقسات بەرمەدى.