قاراساي اۋدانىنداعى «Line Brew Bottlers» ج ش س - سىرا وندىرەتىن ءىرى كاسىپورىنداردىڭ ءبىرى. زاۋىتتا زاماناۋي تەحنولوگيالار مەن ۇزدىك اۆستريالىق جابدىقتار قولدانىلادى. بۇل ءوز كەزەگىندە جوعارى ساپالى ءونىمنىڭ شىعۋىن عانا ەمەس، ونىڭ ەكولوگيالىق قاۋىپسىزدىگىن دە قامتاماسىز ەتەدى.

الايدا وسىدان ءبىراز ۋاقىت بۇرىن شەندىلەردىڭ ارەكەتىنەن كاسىپورىن جۇمىسىن توقتاتىپ، بانكروتقا ۇشىراۋدان امان قالدى. وبلىستىق كاسىپكەرلەر پالاتاسىنىڭ ساراپشىلارى ءىستى قولعا العاننان كەيىن جاعداي وزگەرە ءتۇستى.

بۇعان دەيىن الماتى وبلىسىنىڭ قاراساي اۋدانىنىڭ مامانداندىرىلعان اۋدانارالىق اكىمشىلىك سوتى جشس-عا 200 ايلىق ەسەپتىك كورسەتكىش (481 مىڭ تەڭگە) تۇرىندە ايىپپۇل سالىپ، قۇيىلۋ سەحىنىڭ قىزمەتىن ءبىر ايعا توقتاتۋ تۋرالى شەشىم شىعاردى. وسىنداي قاتال ۇيعارىمعا اۋداندىق قوعامدىق دەنساۋلىق ساقتاۋ باسقارماسىنىڭ سانيتارلى-ەپيدەميولوگيالىق سالاسىندا انىقتالعان فاكتىلەر نەگىز بولدى.

«سەح جۇمىسىن ءبىر ايعا توقتاتۋ كاسىپورىندى جابۋمەن تەڭ. مۇنىڭ سالدارى سالىق پەن جۇمىسشىلارعا ەڭبەكاقى تولەمەۋگە اكەلەدى. سونىمەن بىرگە، سوتتىڭ بەرگەن اكىمشىلىك جازاسى جاسالعان قۇقىقبۇزۋشىلىقتىڭ تۇرىنە سايكەس كەلمەيدى جانە وندىرىستىك سەبەپتەر ەسەپكە الىنباعان. سوندىقتان سوتتىڭ ءبىرىنشى ساتىداعى شىعارىلعان قاۋلىسىن الىپ تاستاۋ جونىندەگى اپەللياسيالىق شاعىمى بەرىلدى»، - دەيدى ءىستىڭ ءمان-جايىن تۇسىندىرگەن الماتى وبلىسى كاسىپكەرلەر پالاتاسىنىڭ كاسىپكەرلەردىڭ قۇقىعىن قورعاۋ جانە اكىمشىلىك كەدەرگىلەردى ازايتۋ جونىندەگى ءبولىمنىڭ ساراپشىسى دياس وتاشبايەۆ.

ايتا كەتۋ كەرەك، شاعىمدى قاراستىرۋ كەزىندە كاسىپورىن تاراپىنان باسقارمانىڭ بارلىق نۇسقامالارى تولىعىمەن ورىندالعان. وسى سەبەپتى سەح جۇمىسىن توقتاتۋ تۋرالى قوسىمشا جازانى تاعايىنداۋعا سوتتا نەگىز قالمادى.

« ... اتالعان قوسىمشا جازا كاسىپورىننىڭ توقتاۋىنا، جۇمىسشىلاردىڭ ەرىكسىز جۇمىسقا كەلمەۋى مەن ەڭبەكاقى الماۋىنا، بيۋدجەتكە سالىقتىڭ تۇسپەۋىنە، وسىلايشا كاسىپورىن مەن مەملەكەت قىزمەتىن تەرىس زارداپتارعا اكەپ سوقتىرادى»، - دەلىنگەن الماتى وبلىستىق سوتىنىڭ قاۋلىسىندا.

وسىلايشا سوت كومپانيانىڭ شاعىمىن ءىشىنارا قاناعاتتاندىرىپ، قۇيىلۋ سەحىنىڭ قىزمەتىن ءبىر ايعا توقتاتۋ تۋرالى شەشىمدى وزگەرتتى. قازىرگى تاڭدا زاۋىت كۇندەلىكتى قىزمەتىن جالعاستىرىپ كەلەدى.