بۇگىن وڭتۇستىك قازاقستان وبلىسىنداعى «قاجىمۇقان» cپورت الاڭىندا قىزمەت ىستەرى ورگاندارىنىڭ 20 جىلدىعى مەرەيتويى قارساڭىندا ۇيىمداستىرىلعان سپارتاكيادانىڭ اشىلۋ سالتاناتى ءوتتى، دەپ حابارلايدى Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ.

جارىسقا قاتىسۋشىلاردى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وقو بويىنشا دەپارتامەنتىنىڭ باسشىسى ءا.كومەكبايەۆ پەن وبلىس اكىمى اپپاراتىنىڭ باسشىسى اۋەلحان تۇرعىمبەكوۆ قۇتتىقتاپ، ساتتىلىك تىلەدى. 

«مەملەكەتتىك قىزمەت – ءاربىر مەملەكەتتىڭ قالىپتاسۋى مەن دامۋىنىڭ باستى نەگىزى ەكەنىن ەسكەرسەك، ەلباسىمىز كاسىبي مەملەكەتتىك اپپارات قۇرۋدى كوزدەگەن ۇلت جوسپارىن ەنگىزگەلى 3 جىلعا جۋىق ۋاقىت ءوتتى. 1999 جىلى ەلىمىزدە العاش رەت «مەملەكەتتىك قىزمەت تۋرالى» زاڭ قابىلدانىپ، مەملەكەتتىك قىزمەتتىڭ كونكۋرستىق مودەلى قالىپتاستى. وسىدان باستاپ، مەملەكەتتىك قىزمەت ۇدايى جەتىلدىرىلۋ ۇستىندە. ەندىگى مەجە دامىعان 30 ەلدىڭ قاتارىنا قوسىلۋ بولسا، بۇل بەلەستى باعىندىرۋعا جوعارى دەڭگەيلى مەملەكەتتىك اپپارات قاجەت. ءاربىر مەملەكەتتىڭ جارقىن بولاشاققا قاراي جاساعان قادامى مەن ىلگەرى دامۋى مەملەكەتتىك قىزمەتشىلەردىڭ قىزمەتىنە تىكەلەي تاۋەلدى. كاسىبيلىكتى قامتاماسىز ەتۋ تۇرعىسىندا، مەملەكەتتىك قىزمەتشىلەردىڭ الەۋەتىن دامىتۋ ءۇشىن بارلىق جاعدايلار جاسالۋدا»،-دەدى ءا.كومەكبايەۆ.

سپورتتىق جارىسقا 84 مەملەكەتتىك ورگاننىڭ 1200-گە جۋىق اكىمشىلىك قىزمەتشىلەرى مەن قۇقىق قورعاۋ قىزمەتىنىڭ وكىلدەرى قاتىسىپ، ولار ۆولەيبول، شاعىن فۋتبول، گىر كوتەرۋ، ءجۇزۋ، ارقان تارتۋ، ۇستەل تەننيسى سىندى سپورتتىڭ 6 تۇرىنەن  سايىسقا تۇسەدى.

قازىرگى تاڭدا وبلىسىمىزدا مەملەكەتتىك قىزمەتشىلەردىڭ 50 پايىزعا جۋىعىنىڭ مەملەكەتتىك قىزمەتتەگى وتىلدەرى 10 جىلدان اسادى. وسىلايشا قىزمەتشىلەر مەملەكەتتىك قىزمەتتە تۇراقتانىپ، ناتيجەلى قىزمەت اتقارۋدا.

ال مانساپتىق مودەلدىڭ باستى قاعيداتى - مەملەكەتتىك قىزمەتشىنىڭ جەكە سىڭىرگەن ەڭبەكتەرى مەن جەتىستىكتەرىن مويىنداۋ بولسا، وبلىسىمىزداعى قىزمەتشىلەردىڭ مانساپتىق ءوسۋ دەڭگەيى 80،5 پايىزعا جەتىپ وتىر. بۇل – مەملەكەتتىك قىزمەتشىلەردى قىزمەت بابىندا ىلگەرىلەتۋدەگى اشىقتىق پەن ادىلدىك قاعيداتتارىنىڭ شىنايى ايعاعى.

سونىمەن بىرگە، ۇلت جوسپارىنا سايكەس، ورگانداردا اعىمداعى جىلدىڭ باسىنان باستاپ مەملەكەتتىك قىزمەتشىلەردىڭ ەڭبەگىنە اقى تولەۋدىڭ پيلوتتىق جاڭا جۇيەسى ەنگىزىلدى. دالىرەك ايتقاندا، ءاربىر لاۋازىمنىڭ مەملەكەتتىك قىزمەت جۇيەسىندەگى ءرولى مەن تيىمدىلىگى ەسەپكە الىنا وتىرىپ، فاكتورلى-باللدىق دەگەن شكالا بويىنشا جالاقى ەسەپتەلۋدە. بۇعان قوسا، قىزمەتشىلەرگە جىل قورىتىندىسىمەن ەرەكشە قوسقان ۇلەستەرى مەن جەكە باستامالارى ءۇشىن قوماقتى بونۋستار تولەنەدى.

وسىلايشا، ەلباسىمىز مەملەكەتتىك قىزمەتتىڭ ماڭىزدىلىعىن ۇلت جوسپارىنىڭ كاسىبي اپپارات قۇرۋ باعىتىمەن ودان ءارى ارتتىرا ءتۇستى.