«قازگيدرومەت» رمك-نىڭ حابارلاۋىنشا، 22 مامىردا ەلوردا اۋماعىندا ەكپىنى 25 م/س جەتەتىن دۇلەي داۋىل سوققان بولاتىن، دەپ جازادى Qamshy.kz اقپارات اگەنتتىگى. 

ءقازىر استانانىڭ كوممۋنالدىق قىزمەتتەرى كۇشەيتىلگەن رەجيمدەگى جۇمىسقا كىرىسىپ، داۋىلدىڭ سالدارىن جويىپ جاتىر.  14:30-داعى جاعدايعا سايكەس جەدەل جاردەم قىزمەتىنە جەڭىل جاراقات العان 13 ادام جۇگىنگەن.

داۋىل سالدارىنان تۇركىستان كوشەسىندەگى قۇرىلىس الاڭىندا مۇنارا كران، بەيبىتشىلىك جانە كەلىسىم سارايى عيماراتىنان كەراموكرانيت، ارناساي 127 مەكەن-جايى بويىنشا ورنالاسقان تۇرعىن ءۇي الابىنىڭ توبەسىنەن شاتىر جابىندىسى قۇلاپ، № 24 وم عيماراتىنىڭ، ۇركەر شاعىن اۋدانىندا ە- 638 مەكەن-جايى بويىنشا ورنالاسقان № 91 بالاباقشانىڭ شاتىر جابىندىسى ۇشىپ كەتىپ، اۆتوكولىككە زاقىم ءتيدى.

وقىس وقيعالاردىڭ سالدارى تۋرالى اقپاراتتى (فوتو، ۆيدەو) قالا تۇرعىندارى 109 تەلەفونى بويىنشاIkomek مونيتورينگ جانە جەدەل ارەكەت ەتۋ ورتالىعىنا حابارلاي الادى. 

سونداي-اق، «قازگيدرومەت» رمك-نىڭ مالىمەتى بويىنشا 23 مامىردا ەلوردا اۋماعىندا جەلدىڭ كۇشەيۋىنە بايلانىستى دابىلدى ەسكەرتۋ جاريالاندى. سولتۇستىك-باتىستان سوققان جەلدىڭ ەكپىنى 25 م/س (نورمادان 2 ەسە ارتىق) دەيىن جەتپەك.

كۇندىز جاڭبىر جاۋىپ، كۇشتى جەل سوعۋى ىقتيمال. اۋا رايىنىڭ قولايسىزدىعىنا بايلانىستى ۆەدومستۆو ماماندارى قاتتى جەل كەزىندە پاتەردەگى نەمەسە ۇيدەگى تەرەزەلەردى تىعىز جابۋعا، تەرەزەدەن سىرتقا قۇلاپ كەتۋى مۇمكىن زاتتاردى بالكونداردان الىپ تاستاۋعا،  كوشەدەگى باعانداردان، اعاشتاردان، جارنامالاردان، ەجج جانە سىمداردان الىس جۇرۋگە تىرىسۋعا؛ ۇزىلگەن سىمدارعا جانە قوزعالىپ تۇرعان زاتتارعا جاقىنداماۋعا؛ ولاردىڭ جانىندا كولىكتى قالدىرماۋعا، جەل باسىلعانشا ەڭ جاقىن تۇرعان عيماراتتا (دۇكەن، كىتاپحانا، ساۋدا ورتالىعى، ءۇي پودەزدى، كينوتەاتر) جاسىرىنۋعا كەڭەس بەرەدى.