بۇدان بىلاي «نۇر وتان» پارتياسى مەكتەپ اسحانالارىنىڭ جۇمىسىن جەتىلدىرۋدى ءۇش باعىت بويىنشا جۇرگىزبەك. بۇل تۋرالى پارتيا ءتوراعاسىنىڭ ءبىرىنشى ورىنباسارى مالىمدەدى. بۇگىن ماۋلەن اشىمبايەۆ استانا قالاسىنداعى №15 مەكتەپ-ليسەيگە ارنايى بارىپ، اتالعان باعىتتاعى پارتيالىق جوبانىڭ جۇزەگە اسىرىلۋ بارىسىمەن تانىستى.

مەكتەپ اسحاناسىنىڭ جۇمىسىمەن تانىسقان ماۋلەن اشىمبايەۆ ەلىمىزدە وسى سالادا كەيبىر كەلەڭسىزدىكتەر بار ەكەنىن ايتتى. ونىڭ سوزىنە قاراعاندا، كەيبىر وقۋ ورىندارىندا ءتيىستى تالاپتار ساقتالا بەرمەيدى. ياعني، اس مازىرىنەن باستاپ، ونىڭ قۇرامى، قىزمەت ساپاسى، تازالىق سياقتى نەگىزگى باعىتتاردا ايتارلىقتاي ولقىلىقتار بار. سوندىقتان بارلىق مەكتەپتەرگە ورتاق ءبىرىڭعاي ستاندارت دايىنداپ، اسحانا جۇمىسىن سول تالاپتارعا ساي جۇرگىزۋدىڭ بەرەرى مول بولماق. ول نورمالاردى دايىنداۋ ءۇشىن عالىمداردى، بىلىكتى، كاسىبي مامانداردى جانە ءتيىستى مەملەكەتتىك ورگانداردى جۇمىلدىرۋدىڭ دا ماڭىزى زور ەكەنى انىق.

سونىمەن قاتار پارتيا ءتوراعاسىنىڭ ءبىرىنشى ورىنباسارى بۇگىندە مەكتەپ اسحانالارىندا كوبىنە ۇننان جاسالعان، ءتاتتى، قۋىرىلعان جانە مايلى تاعامدار قولدانىلاتىنىن ايتتى. ودان بولەك، ول مەكتەپ اسحاناسىن جالعا الىپ وتىرعان كاسىپكەرلەردىڭ كەلەسى جىلى دا سول جەردە جۇمىس ىستەيتىنىنە ەشقانداي كەپىلدىك جوق ەكەنىنە نازار اۋداردى. سونىڭ سالدارىنان ولار جاڭا قوندىرعىلار الىپ، قىزمەت ساپاسىن جاقسارتۋعا قۇلىقسىز بولىپ وتىر. ەگەر ۇزاقمەرزىمدى كەلىسىممەن جۇمىس ىستەيتىن بولسا بۇل جاعدايدىڭ وڭ باعىتتا وزگەرەتىنىنە توقتالعان ماۋلەن اشىمبايەۆ وسى سالاداعى اتقارىلار جۇمىستاردىڭ باسىم باعىتتارىن ايقىنداپ بەردى.

– بىرىنشىدەن، مەكتەپ پەن بيزنەس قاۋىمداستىقتىڭ ۇزاقمەرزىمدى ىنتىماقتاستىعىن قالىپتاستىرۋدىڭ ءتيىمدى تەتىگىن تابۋىمىز كەرەك. ەكىنشىدەن، ەلىمىز بويىنشا بارلىق مەكتەپتەرگە ارنالعان مىندەتتى، ناقتى، ءبىرىڭعاي بازالىق ستاندارت قالىپتاسىپ، اسحانا جۇمىسى جۇيەلەنۋى ءتيىس. ۇشىنشىدەن، وسى جۇمىستاردىڭ بارلىعىنا تۇراقتى ءارى جۇيەلى قوعامدىق باقىلاۋ جۇرگىزۋدىڭ بەرەرى مول بولماق. بۇل يگى ىسكە پارتيادان بولەك، جاۋاپتى مينيسترلىكتەر، اتا-انالار كوميتەتى جانە بىلىكتى ماماندار بەلسەنە قاتىسۋى ءتيىس، – دەدى ماۋلەن اشىمبايەۆ.

سونداي-اق ماۋلەن اشىمبايەۆ ەلورداداعى №73 مەكتەپ-ليسەيدە دە بولىپ، ونداعى ءىت-سىنىپتىڭ جۇمىس بارىسىن باقىلاپ قايتتى. بۇل سىنىپتىڭ پارتيانىڭ «تەگىن 1000 ءىت-سىنىپ» جوباسى اياسىندا اشىلعانىن اتاپ وتكەن ءجون. مۇندا بالالار باعدارلامالاۋ مەن روبوت تەحنيكالارىنىڭ نەگىزدەرىن ۇيرەنەدى. ءوز سوزىندە ماۋلەن اشىمبايەۆ قازىرگى تاڭدا ەلىمىزدە ءدال وسى سالالاردا مامان تاپشى ەكەنىن ايتىپ، بۇل باستامانىڭ بەرەرى مول ەكەنىنە توقتالدى.

ايتا كەتەيىك، «نۇر وتان» پارتياسى پارتيا قىزمەتىن جاڭعىرتۋ اياسىندا 20-دان استام جاڭا جوبانى جۇزەگە اسىرۋدا. ولاردىڭ قاتارىندا سيفرلاندىرۋ ۇدەرىسىنە ۇلەس قوسۋ، شاعىن جانە ورتا بيزنەستى قولداۋ جانە «رۋحاني جاڭعىرۋ» باعدارلاماسىن جۇزەگە اسىرۋعا باعىتتالعان پارتيالىق جوبالار بار.