25 مامىردا قازىلار القاسى سوتتالۋشىلاردىڭ اپەللياسيالىق شاعىمى بويىنشا شەشىم شىعاردى، - دەپ حابارلايدى Tengrinews.kz.

كوللەگيا قىلمىستىق ءىس بويىنشا ءتورت ايىپتالۋشىنىڭ جازاسىن جەڭىلدەتتى. ولاردىڭ قاتارىندا ەكس-مينيستر قۋاندىق بيشىمبايەۆتىڭ نەمەرە اعاسى، پارا الدى دەپ ايىپتالىپ، جەتى جىلعا سوتتالعان سۇلتان نۇرلىبەك بار.

"نۇرلىبەككە ق ر قك 366-بابى 4-بولىگى، 28-بابى 5-بولىگى بويىنشا تاعىلعان جازاعا ق ر قك 55-بابى 4-بولىگى قولدانىلا وتىرىپ، باس بوستاندىعىنان ايىرۋ مەرزىمى بەس جىلعا دەيىن تومەندەتىلسىن. (...) 2016 جىلى 13 جەلتوقساندا قابىلدانعان "تاۋەلسىزدىكتىڭ 25 جىلدىعىنا وراي راقىمشىلىق جاساۋ تۋرالى" قازاقستان رەسپۋبليكاسىنىڭ زاڭى نەگىزىندە يبراشيەۆكە، يسابەككە، قوجابايەۆقا كەسىلگەن جازا تورتتەن ءبىر بولىككە قىسقارتىلسىن. يبراشيەۆكە - 3 جىلعا باس بوستاندىعىنان ايىرۋ، يسابەك، قوجابايەۆقا ءارقايسىسىنا ءبىر جىل التى ايدان باس بوستاندىعىنان ايىرۋ جازاسى تاعايىندالسىن"، - دەدى القا ءتورايىمى الما ەسىموۆا.

ايتا كەتەيىك، بيشىمبايەۆقا قاتىستى شىققان سوت ۇكىمى وزگەرىسسىز قالعان بولاتىن.

بيىل 14 ناۋرىزدا قۋاندىق بيشىمبايەۆ 10 جىلعا سوتتالعان ەدى. "10 جىلعا باس بوستاندىعىنان جانە ءومىر بويىنا مەملەكەتتىك قىزمەتتەردە باسشى لاۋازىمدارىندا جۇمىس ىستەۋ قۇقىعىنان ايىرىلسىن. جازاسىن ماكسيمالدى ءقاۋىپسىز مەكەمەدە وتەسىن، سونداي-اق، مۇلكى تاركىلەنسىن"، - دەپ وقىعان ەدى ۇكىمدى سۋديا ءادىلحان شايحيسلاموۆ.