ق ر ەكس-پرەمەر-مينيسترى سەرىك احمەتوۆ قاراعاندى سوتىنان بوستاندىعىن شەكتەۋ جازاسىن ايىپپۇلعا اۋىستىرۋدى سۇرادى، ءبىراق كەيىن ءوز مالىمدەمەسىن كەرى قايتارىپ الدى.

جازانى جەڭىلدەتۋ تۋرالى ءوتىنىشىن سەرىك احمەتوۆ 15 مامىردا قازىبەك اۋداندىق سوتىنا وتكىزگەن. قۇجاتتا كورسەتىلگەندەي، احمەتوۆتىڭ ادۆوكاتى سوتتان بوستاندىعىن شەكتەۋ جازاسىن ايىپپۇلعا اۋىستىرۋدى وتىنگەن. الايدا ءوتىنىش حات كەرى قايتارىلدى. مۇنىڭ سەبەبى ازىرگە جاريالانعان جوق.

«وسى مازمۇنداعى ءوتىنىش حات احمەتوۆتىڭ ادۆوكاتىنان كەلىپ تۇسكەنى راس. ءبىراق 23 مامىردا ادۆوكات سوتقا كەلىپ قازىرگى ۋاقىتتا ونى قولدامايتىنىن ايتىپ، ءوتىنىش حاتتى كەرى قايتارىپ الدى. سول سەبەپتى سۋديا مانات جۇماقايەۆا ءوتىنىش حاتتى قاراۋسىز قايتارىپ بەردى. 24 مامىردا سۋديا ءتيىستى قاۋلى شىعاردى»، - دەلىنگەن سوتتىڭ باسپا ءسوز قىزمەتىندە.

ايتا كەتەيىك، سەرىك احمەتوۆ 2015 جىلدىڭ جەلتوقسانىندا 10 جىلعا باس بوستاندىعىنان ايىرىلىپ، دۇنيە مۇلكى تاركىلەنگەن. بۇعان دەيىن 2،2 ميلليارد تەڭگە كولەمىندە مەملەكەتكە كەلتىرىلگەن شىعىندى وتەدى. سونىڭ ارقاسىندا سوت ەكس-پرەمەردىڭ جازاسىن 10 جىلدان 8 جىلعا دەيىن قىسقارتتى. بىلتىر قاڭتاردا امنيستياعا ىلىككەنى بەلگىلى بولدى. 2017 جىلدىڭ 21 قىركۇيەگىندە سەرىك احمەتوۆ بوستاندىققا شىقتى.