بۇگىن الماتىدا 1931-1933 جىلدارعى اشارشىلىق قۇرباندارىنىڭ ەسكەرتكىشىنە گۇل شوقتارى قويىلدى، اتالعان شاراعا قوعام قايراتكەرلەرى، رەپرەسسيا مەن اشارشىلىق قۇرباندارىنىڭ ۇرپاقتارى، ۇكىمەتتىك ەمەس ۇيىمدار وكىلدەرى جانە قالا جاستارى قاتىستى. بۇل جايىندا Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.
الماتى اكىمى باۋىرجان بايبەك بىلتىر مەملەكەت باسشىسىنىڭ تاپسىرماسىمەن قالا ورتالىعىندا اشارشىلىق قۇرباندارىنا ەسكەرتكىش ورناتىلعانىن، وندا قولىنا ارىپ-اشقان، ءولىمشى حالدەگى بالاسىن ۇستاعان انا بەينەسىندەگى قازاق حالقىنىڭ اۋىر تاعدىرى بەينەلەگەنىن اتاپ ءوتتى.
«تاريحتىڭ شەرلى ءۇنىن جەتكىزگەن بۇل ەسكەرتكىش – قالامىزدىڭ كيەلى نىساندار تىزىمىنە ەندى. بۇل – ەلباسى اتاپ وتكەندەي، «اشارشىلىقتا قۇربان بولعان ميلليونداردىڭ رۋحىنا بۇگىنگى بۋىننان تاعزىم جانە كەلەر ۇرپاق اتا-بابالارىنىڭ قانداي قاسىرەتتەردى باستان وتكەرگەنىن ءبىلىپ جۇرۋىنە قاجەت تاعىلىم»، - دەدى باۋىرجان بايبەك.
ول سول ءبىر قاسىرەتتى جىلدارى قازاق حالقىنىڭ ءوز ەڭسەسىن تىك كوتەرىپ قانا قويماي، قازاق توپىراعىنا جەر اۋدارىلعان وزگە ۇلت وكىلدەرىن باۋىرىنا تارتىپ، قامقورلىعىنا العانىن اتاپ ءوتتى.
«ال بۇگىن، ءبىز ەڭ قۇندى بايلىعىمىز تاۋەلسىزدىگىمىزدى الىپ، سونۋگە اينالعان شىراعىمىزدى قايتا جاقتىق. ءبىر شاڭىراقتىڭ استىندا 100-دەن استام ۇلىستار ۇيىسقان قازاقستان – بەيبىتشىلىك پەن بىرلىكتىڭ مەكەنىنە اينالدى. كەشەگى ارىستارىمىزدىڭ اسىل ارمانى ورىندالىپ، ەل تۇتقاسىن ۇستاعان ەلباسى مەن ەڭسەلى ەلورداسى بار الەم تانىعان قۋاتتى ەل بولدىق»، - دەپ اتاپ ءوتتى الماتى اكىمى.
ەسكە سالساق، «قاراعايلى» سكۆەرىندە 1931-1933 جىلدارعى اشارشىلىق قۇرباندارىنا ەسكەرتكىش ورناتىلعان بولاتىن. بيىكتىگى ءۇش مەترلىك قولا مەن گرانيتتەن قۇيىلعان سكۋلپتردە اشتىقتان ءولىمشى بولعان بالاسىن كەۋدەسىنە باسقان انا بەينەلەنگەن. قازاقستاندا 1918 جىلدان 1933 جىلدار ىشىندە ءتۇرلى مالىمەتتەر بويىنشا ءۇش ميلليوننان استام ادام جاپپاي قىرىلعان، سونىڭ ىشىندە 1931 جىلدان 1933 جىل ارالىعىندا 1 ملن. 700 مىڭعا جۋىق ادام قۇربان بولعان. 1937-1938 جىلدارى 100 مىڭنان استام قازاقستاندىق قۇرباندىققا ۇشىراعان.
قالادا وتكەن جىلى ءبىرقاتار كوشەلەرگە ۇلتىمىزدىڭ ماقتانىشىنا اينالعان باتىرلاردىڭ، اقىنداردىڭ، جازۋشىلاردىڭ ەسىمدەرى بەرىلدى. ولاردىڭ اراسىندا سماعۇل ءسادۋاقاس ۇلى، تەلجان شونان ۇلى، جانشا دوسمۇحامەدوۆ، تالعات بيگەلدينوۆ، ساعادات نۇرماعانبەتوۆ، تۇمانباي مولداعالييەۆ، قادىر مىرزالييەۆ، ءامينا ءومىرزاقوۆا، ماقاش ءتاتىموۆ، گەرولد بەلگەر بار.
