قازاقستان جازۋشىلار وداعىندا الاش ارىستارى مەن اشارشىلىق قۇرباندارىنا ارنالعان "ءان - ءمىناجات، جىر - دۇعا" اتتى رۋحاني كەش ءوتتى.
كەشكە قازاقستان جازۋشىلار وداعىنىڭ باسقارما ءتوراعاسى ۇلىقبەك ەسداۋلەت، ق ر ەڭبەك سىڭىرگەن قايراتكەرى، جازۋشى سماعۇل ەلۋباي، جازۋشى، دراماتۋرگ سوفى سماتايەۆ، حالىقارالىق "الاش" ادەبي سىيلىعىنىڭ يەگەرى، اقىن جاركەن بودەش ۇلى، اقىن جاراس سارسەك، الاشتانۋشى، جۋرناليست بولات ءمۇرسالىم، ت.ب. تانىمال تۇلعالار قاتىستى. كەشتى جازۋشىلار وداعى ءتوراعاسىنىڭ ورىنباسارى، اقىن باقىت بەدەلحان جۇرگىزدى.
العاش بولىپ ءسوز العان قازاقستان جازۋشىلار وداعىنىڭ باسقارما ءتوراعاسى ۇلىقبەك ەسداۋلەت: "بۇل - ءبىر جاعىنان جازىقسىز قۇربانداردى قاستەرلەۋ كۇنى بولسا، ءبىر جاعىنان ولاردى ەسكە الىپ، ازا تۇتۋ كۇنى. وسى قاسيەتتى قارا شاڭىراق - جازۋشىلار وداعىندا اتىلعان ارىستارىمىزدىڭ تابانىنىڭ ءىزى، ەستەلىكتەرى قالماسا دا، رۋحىمەن دەمەپ، قولداپ تۇرعاتىنداي. ويتكەنى، قازاقتىڭ سول ۇلكەن ارىستارىنىڭ ءبىرازى وسى جازۋشىلار وداعىن قۇرۋعا اتسالىسقان ادامدار قاتارىنان. كەڭەس وداعىنىڭ قىزىل تەررورىنىڭ جالعاسى رەتىندە "اسىرا سىلتەۋ بولماسىن، اشا تۇياق قالماسىن" دەپ حالىقتى اشتىققا، قىرعىنعا ۇشىراتقانى، ودان بەرگى جىلداردا الاشتىڭ ارداقتى ارىستارىن شەتىنەن قۇرباندىققا شالعانى، جازىقسىز قۋعىن-سۇرگىنگە ۇشىراتقانى، حالىقتىڭ قايماقتارىن قالقىپ الىپ، قالعانىن تەنتىرەتىپ جىبەرگەندەي زوبالاڭ كۇيگە تۇسىرگەنى ءالى الەمدىك تاريحتان ءوز باعاسىن العان جوق. بۇرىن-سوڭدى بولماعان قىرعىن كۇنى بەلگىلەنىپ، تاعزىم ەتەتىن، ەسكە الاتىن، ازا تۇتاتىن، ارداقتايتىن، قاستەرلەيتىن اتاۋلى كۇندى ارنالعانىنىڭ وزىنە ءبىز ىشتەي شۇكىرشىلىك ەتەمىز"، - دەدى.
كەزەكتى ءسوز العان جازۋشى سماعۇل ەلۋباي: "رەسمي تۇردە "31 مامىر قۋعىن-سۇرگىن قۇرباندارىن ەسكە الۋ كۇنى" دەپ اتالدى. مەن وسى اتاۋدىڭ وزىندە ءبىر شيكىلىك بار ەكەنىن ايتقىم كەلەدى. اشارشىلىق - ەلۋ جىل بويى سوۆەت يدەولوگياسىن ۇركىتكەن ءسوز. تاۋەلسىز قازاقستان تۇسىندا دا سول زاڭدى قابىلدايتىن كەشەنى كوممۋنيستەرىمىز ۇركىپ، اشارشىلىق دەگەن ءسوزدى الىپ تاستاعان بولاتىن. بۇل 1995 جىلى بولعان وقيعا. ءسويتىپ، قۋعىن-سۇرگىن قۇرباندارىن عانا قالدىردى. بۇل اشارشىلىقتان كەتكەن 4 ملن. حالىقتىڭ ارۋاعىنا جاسالعان قيانات بولدى. مەنىڭشە، بۇل ماسەلە قايتا قارالۋى ءتيىس. جانە بۇل اپاتتىڭ اتى "اشارشىلىقتان قىرىلعان حالىقتىڭ جالپىۇلتتىق ازا تۇتۋ كۇنى" دەپ اتالۋى كەرەك"، - دەدى.
الاشتانۋشى-جۋرناليست بولات ءمۇرسالىم: "ماعجاننىڭ "ساباتايەۆ ساتىلعان، كوشەدە ءجۇرىپ اتىلعان" دەگەن ولەڭى بار. سول "ساتىلعان ساباتايەۆ" وسى جەتىسۋ وڭىرىنەن شىققان الاشورداشى، الاشوردا ۇكىمەتىنىڭ مۇشەسى بولعان ازامات. سول كىسى جاركەنتتە وق ءتيىپ، قازا بولعان. ماعجاننىڭ بۇل ولەڭى تەگىن ولەڭ ەمەس. ويتكەنى، سول كەزەڭدە قازاقتىڭ قاي زيالىسى بولسىن، توتاليتارلىق جۇيەنىڭ ساقتاپ وتىرعان وعى بولعان. سوۆەت ۇكىمەتى ەڭ العاش قۇرىلعان كۇننەن باستاپ، قاندى ۇكىمەت بولاتىن. بيلىككە كەلۋىنىڭ ءوزى زاڭسىز، قاندى جولمەن كەلگەن. لەنين دە، ستالين دە سونىڭ ءبارىن زاڭداستىرىپ وتىرعان. قازاق زيالىلارىنىڭ اراسىنداعى توپتاسۋ، تەكەتىرەس رەپرەسسيانىڭ باسى ەمەس ەدى. ول جاي عانا كەز كەلگەن حالىقتا بولاتىن ءوز زيالىلارىنىڭ اراسىندا بولاتىن تەكەتىرەس ەدى. ال ونىڭ ۇيىمداستىرۋشىسى - ماسكەۋ بولاتىن"، - دەدى.
كەش بارىسىندا ەركىن شۇكىمان، ساۋلەجان سىندى تانىمال انشىلەر الاش ارىستارىنا ارنالعان اندەردى ورىنداسا، باقىت بەدەلحان، جاراس سارسەك، باعدات مۇباراك سىندى اقىندار ولەڭدەرىن وقىدى.
كەش سوڭىندا قازاقستان جازۋشىلار وداعىنىڭ جاڭا مۇشەلەرى - مۇرات شايماران، ساكەن سىبانباي، جاڭىلحان اسىلبەكوۆا، ارداق نۇرعازى، داۋرەن قۋات، قويشىبەك مۇباراك، دميتريي يۆانوۆ، ىرىسبەك دابەي، ەربولات تۇرسىنبەك، ءتوقتارالى تاڭجارىق، دارحان بەيسەنبەك ۇلى، ماقسات رامازانۇلىنا كۋالىك تابىستالدى.
