استانا اكىمى سوڭعى كەزدەرى قوعامدا قىزۋ تالقىلانىپ جاتقان جولاقىنى 200 تەڭگەگە دەيىن كوتەرۋ ماسەلەسىنە قاتىستى تۇسىنىكتەمە بەردى، دەپ جازادى Qamshy.kz اقپارات اگەنتتىگى.

«2014 جىلدان بەرى تاريف باعالارى كوتەرىلگەن جوق. ول ۋاقىتتان بەرى ەكى رەت ديەۆالۆاسيا بولدى. جانارماي باعاسى كوتەرىلسە دە، تاريف سول قالپى بولدى. قازىرگى ۋاقىتتا اۆتوپاركتەرمەن ەكونوميكالىق مودەل ماسەلەسىن تالقىلاپ جاتىرمىز. وبەكتيۆتى باعا بەرۋ ءۇشىن بانكيرلەردى دە شاقىردىق. ءماسليحاتتا ءسوز بولعان تاريف مولشەرى سۋبسيديانى تولەۋ ءۇشىن ماڭىزدى ەكەنىن ءتۇسىنۋ كەرەك. اۆتوپاركتەر 300، 500 تەڭگەگە دەيىن ۇسىندى. ءبىراق ءبىز 200 تەڭگەگە توقتالدىق. ول ەسەپتىك تاريف جانارماي ساتىپ الۋدى، جۇرگىزۋشىلەر، كوندۋكتورلاردىڭ ايلىعىن، ترانسپورتتى جوندەۋ جۇمىستارىن قامتاماسىز ەتۋ كەرەك»، - دەدى ەلوردا اكىمى وكق-دە وتكەن باسپا ءسوز ءماسليحاتىندا.

يسەكەشيەۆتىڭ ايتۋىنشا، بۇل ماسەلە الدىمەن قوعامدىق كەڭەستە، ساراپشىلار كەڭەسىندە، ءماسليحاتتا، كەيىن اكىمدىكتە تالقىلانادى، تەك سودان كەيىن شەشىم قابىلدانادى.

«ءبىز بيىل جولاقىنى كوتەرۋدى جوسپارلاپ وتىرعان جوقپىز. تولەم كارتاسى بويىنشا قالا تۇرعىندارى ادەتتەگىدەي 90 تەڭگە تولەيدى. ءبىراق ءبىز سارالانعان ءتاريفتى ەنگىزەمىز، ول 180 تەڭگە شاماسىندا بولماق. ياعني، كارتامەن تولەم جاساعىسى كەلمەيتىندەر قولما-قول اقشامەن 180 تەڭگە تولەيتىن بولادى. مەنىڭشە، تولەم كارتاسىن ساتىپ الىپ، سول ارقىلى ەسەپ ايىرىسقان ىڭعايلى. قازىرگى ۋاقىتتا تولەم وفيستەرىن كەڭەيتۋ جۇمىسىن جۇرگىزىپ جاتىرمىز. ءبارى ەنگىزىلگەندە شامامەن شىلدەنىڭ ورتاسىنا قاراي ءار تۇرعىن كارتا ساتىپ الىپ، 90 تەڭگەمەن جۇرە الادى»، - دەيدى اكىم.

بۇدان بۇرىن، استانادا قوعامدىق كولىكتەردە سارالانعان تاريف ەنگىزۋ جايلى حابارلانعان. «استانا LRT» ج ش س باسقارماسىنىڭ وكىلى بەكمىرزا يگەنبەردينوۆتىڭ مالىمدەۋىنشە، تۇرعىندار تولەم كارتاسى ارقىلى 120 تەڭگە، ال قولما-قول اقشامەن 200 تەڭگە تولەۋ كەرەك.