بالالار ۇيلەرىن ترانسفورماسيالاۋ قاجەت. مۇنداي ۇسىنىستى بۇگىن ماجىلىستە قازاقستاننىڭ بالا قۇقىقتارى جونىندەگى ۋاكىلى رەتىندە اتقارعان جۇمىسى جايىندا بايانداعان زاعيپا بالييەۆا ايتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
«بالالار ۇيلەرىن ترانسفورماسيالاۋ قاجەت. بالالار ءۇيىن تولىقتاي جاۋىپ تاستاۋعا بولمايدى. ويتكەنى، وكىنىشكە وراي بالالاردى تاستاپ كەتۋ، ولاردان باس تارتۋ تىيىلماق ەمەس. سوندىقتان دا الماتى اكىمدىگىمەن بالالار ۇيلەرىن ترانسفورماسيالاۋ باعىتىندا جۇمىس ىستەپ جاتىرمىز»، - دەدى بالالار ومبۋدسمەنى.
ونىڭ پايىمىنشا، بالالار ۇيلەرى داعدارىس ورتالىعى، اتا-انالاردى دايىنداۋ مەكتەبى رەتىندە قاراستىرىلۋى ءتيىس.
زاعيپا بالييەۆانىڭ دەرەگىنشە، 7 مىڭ جەتىم بالانىڭ 80 پايىزى الەۋمەتتىك جەتىم بولىپ تابىلادى.
«ولاردىڭ اتا-انالارى ءتىرى. سوندىقتان قوعامدى بىزدە بار بارلىق باعدارلاماعا قوسىپ، سول باعىتتا جۇمىس ىستەۋ قاجەت»، - دەدى ول.
بۇعان دەيىن زاعيپا بالييەۆا اقتوبە وبلىسىنداعى ۆيدەوكونفەرەنسيادا بالالار ۇيىنە ۇكىمەتتىك ەمەس ۇيىمداردى جاقىنداتپاۋ كەرەكتىگىن ايتقان بولاتىن.
«مەن بالالار قۇقىعىن قورعاۋ كوميتەتىنەن تاعى دا سۇرايمىن - ءبىر دە ءبىر بالالار ۇيىندە بالالار ءۇيى ۇجىمىنان باسقا، قانداي دا ءبىر قورلار، ۇكىمەتتىك ەمەس ۇيىمدار، باسقا دا ۇيىمدار بولماۋى كەرەك»، - دەپ اتاپ وتكەن ەدى ز.بالييەۆا اقتوبە وبلىسىنداعى ۆيدەوكونفەرەنسيادا.
