بۇگىن الماتى وبلىسى تالعار اۋدانى جاڭالىق اۋىلىندا قۋعىن-سۇرگىن قۇرباندارىن ەسكە الۋعا ارنالعان ميتينگ ءوتتى. وعان وبلىس اكىمى اماندىق باتالوۆ، قوعامدىق ۇيىم وكىلدەرى، رەپرەسسياعا ۇشىراعان ازاماتتاردىڭ ۇرپاقتارى، جەرگىلىكتى تۇرعىندار قاتىستى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەت.

ميتينگىنى ەسكەرتكىش-مەموريالعا گۇل قويۋدان باستاعان وبلىس اكىمى اماندىق باتالوۆ كوپشىلىك الدىندا بايانداما وقىپ، 31 مامىر ەل تاريحىنداعى ەڭ ءبىر ازالى كۇندەردىڭ ءبىرى ەكەنىنە توقتالدى.

– جىل سايىن وسى كۇنى ەل تاۋەلسىزدىگى ءۇشىن كۇرەسكەن، ۇلتىمىزدىڭ ءبىرتۋار، اياۋلى ۇل-قىزدارىن، جازىقسىز جاپا شەككەن قۇربانداردى ەسكە الامىز. جاپپاي ساياسي قۋعىن-سۇرگىن قۇرباندارىن اقتاۋ، زاڭسىز قۋدالانعان ازاماتتاردىڭ قۇقىعىن قالپىنا كەلتىرۋ جۇمىستارى قانشا ۋاقىت وتسە دە توقتالماۋى ءتيىس. ءبىز ەلباسىنىڭ «رۋحاني ءجاڭعىرۋا باعدارلاماسى اياسىندا جازىقسىق قۇربان بولعان بابالاردىڭ رۋحىنا ارناپ، جاڭالىق اۋىلىندا مۋزەي سالۋدى ۇيعارىپ، بيىل قۇرىلىسىن باستادىق. مۋزەيدىڭ ەكسپوزيسيالىق زالىندا ۇلت قايراتكەرلەرى تۋرالى ماتەريالدار قويىلىپ، وسى جەردە جەرلەنگەن ساياسي قۋعىن-سۇرگىن قۇرباندارىنىڭ اتى-جوندەرى تاس تاقتاعا ويىلىپ جازىلاتىن بولادى، – دەدى ا. باتالوۆ.

رەسپۋبليكالىق قۋعىن-سۇرگىنگە ۇشىراعاندار قاۋىمداستىعىنىڭ ءتوراعاسى جۇمابەك اشۋ ۇلى قازاق جەرىندە ءار كەزەڭدە ءتۇرلى سيپاتتا ورىن العان ناۋبەتتەردىڭ تاريحىنا، ونىڭ زالالى مەن بولاشاق ءۇشىن سول قارالى تاريحتى ءبىلۋدىڭ ماڭىزىنا توقتالدى.

ساياسي قۋعىن-سۇرگىن قۇربانى، اقىن، قوعام قايراتكەرى ءىلياس جانسۇگىروۆتىڭ ۇلى سايات جانسۇگىروۆ اكەسىنە ارناعان جۇرەكجاردى ولەڭىن وقىدى.

سودان كەيىن «ادىلەت» قوعامدىق بىرلەستىگىنىڭ ءتوراعاسى عاريفوللا انەس ءسوز سويلەدى. ول وسىدان 20 جىل بۇرىن «ادىلەت» قوعامدىق بىرلەستىگىنە وسى اۋماقتان 17 گەكتار جەر بەرىلگەنىن، سول جەرگە مۋزەي سالۋ تۋرالى ارمانى بيىل جۇزەگە اسقانىن ايتىپ، وبلىس باسشىلىعىنا ريزاشىلىعىن ءبىلدىردى.

– قازاقستاننىڭ ەڭ ءبىر كيەلى جەرىندە تۇرمىز. 4 150 ادامنىڭ وسى جەردە سۇيەگى جاتىر. بۇدان ارتىق قانداي قايعى-قاسىرەت بولۋى مۇمكىن، بۇدان ارتىق قانداي كيەلى جەر بولۋى مۇمكىن! وسى تۇرعان ءبارىمىز دە جىلدا وسى جەرگە كەلىپ، ازا تۇتۋعا جازسىن، – دەدى عالىم.

جينالعاندار ساياسي قۋعىن-سۇرگىن قۇرباندارىن ءبىر مينۋت ۇنسىزدىكپەن ەسكە الىپ، ەكەرتكىشكە گۇل قويدى.

بوزداقتارعا قۇران باعىشتالىپ، اس بەرىلدى.

ايتا كەتەيىك، جاڭالىق اۋىلىندا سالىنىپ جاتقان ساياسي قۋعىن-سۇرگىن قۇرباندارىنا ارنالعان مۋزەيدىڭ جالپى اۋماعى – 535 شارشى مەتر. قۇرىلىس جۇمىستارىنا 288 ملن. تەڭگە بولىنگەن. مەردىگەر كومپانيا – «نۇر-شاپاعات» ج ش س. قۇرىلىس جۇمىستارى بيىل ناۋرىز ايىندا باستالعان.