“قازاقستان رەسپۋبليكاسىنىڭ قاۋىپسىزدىك كەڭەسى تۋرالى” زاڭ جوباسىن پارلامەنتتىڭ ەكى پالاتاسى قابىلداپ، پرەزيدەنت نۇرسۇلتان نازاربايەۆقا جولدادى.

بۇعان دەيىن زاڭ جوباسىن دەپۋتاتتارعا تانىستىرعان قازاقستاننىڭ ادىلەت ءمينيسترى مارات بەكەتايەۆ ونىڭ قابىلدانۋى “قازاقستان قاۋىپسىزدىك كەڭەسىن ەلدىڭ ۇلتتىق قاۋىپسىزدىك پەن قورعانىس قابىلەتىن قامتاماسىز ەتۋشى ورگان رەتىندە تانۋعا” مۇمكىندىك بەرەتىنىن ايتقان.

زاڭ جوباسى بويىنشا قاۋىپسىزدىك كەڭەسى ءتوراعاسىنا قاۋىپسىزدىك كەڭەسىن باسقارۋ، وتىرىستارى مەن جەدەل جينالىستارىن شاقىرۋ، قاۋىپسىزدىك كەڭەس تۋرالى جاعدايدى بەكىتۋ، سونىمەن بىرگە زاڭنامادا قاراستىرىلاتىن وزگە وكىلەتتەردى جۇزەگە اسىرۋ قۇقىعى بەرىلمەك.

زاڭ جوباسىندا قاۋىپسىزدىك كەڭەسىنىڭ مارتەبەسى قايتا قارالعان جانە كەڭەس كونسۋلتاتيۆتى-كەڭەسشى ورگاننان كونستيتۋسيالىق ورگانعا اينالادى. جوبادا قاۋىپسىزدىك كەڭەسىنە ەلدىڭ ۇلتتىق قاۋىپسىزدىگى مەن قورعانىس قابىلەتتىلىگىن قامتاماسىز ەتۋ عانا ەمەس، "ىشكى ساياسي تۇراقتىلىقتى ساقتاپ، حالىقارالىق ارەنادا ەلدىڭ كونستيتۋسيالىق قۇرىلىمى مەن ۇلتتىق مۇددەلەرىن قورعاۋ" جاۋاپكەرشىلىگىن دە جۇكتەۋدى ۇسىنادى.

قۇجاتقا ساي، قاۋىپسىزدىك كەڭەسىنىڭ قۇرامىن پرەزيدەنت كەڭەس ءتوراعاسىنىڭ كەلىسىمىمەن جاساقتايدى.

قاۋىپسىزدىك كەڭەسىنىڭ وتىرىسى

زاڭ جوباسىنىڭ 3 بابىنا سايكەس، پرەزيدەنت، ءماجىلىس جانە سەنات ءتوراعالارى، پرەمەر-مينيستر، مەملەكەتتىك حاتشى، پرەزيدەنت اكىمشىلىگى جەتەكشىسى، قاۋىپسىزدىك كەڭەسى حاتشىسى، باس پروكۋرور، ۇقك ءتوراعاسى، سىرتقى ىستەر ءمينيسترى، قورعانىس ءمينيسترى جانە ىشكى ىستەر ءمينيسترى قاۋىپسىزدىك كەڭەسىنىڭ لاۋازىمى بويىنشا مۇشەلەرى بولادى.

قاۋىپسىزدىك كەڭەسى 1991 جىلى قازاق سسر پرەزيدەنتى بولىپ تۇرعان نازاربايەۆتىڭ جارلىعىمەن ەل تاعدىرىنا بايلانىستى ماڭىزدى ماسەلەلەر شەشىلەتىن كونسۋلتاتيۆتى-كەڭەسشى ورگان بولىپ قۇرىلعان. ول 1993 جىلى قازاقستان رەسپۋبليكاسىنىڭ قاۋىپسىزدىك كەڭەسى بولىپ قايتا قۇرىلعان. ءقازىر قازاقستاندا قاۋىپسىزدىك كەڭەسى قىزمەتىن رەتتەيتىن جەكە زاڭ جوق، بۇل ورگان پرەزيدەنتتىڭ 1999 جىلعى 20 ناۋرىزداعى جارلىعىمەن بەكىتىلگەن ەرەجەلەر نەگىزىندە جۇمىس ىستەيدى.

ازىرشە كونسۋلتاتيۆتى-كەڭەسشى ورگان ستاتۋسىنداعى قاۋىپسىزدىك كەڭەسىنە كۇش قۇرىلىمدارى، ورتالىق جانە جەرگىلىكتى اتقارۋشى بيلىك ورگاندارىنىڭ جۇمىسىن ۇيلەستىرىپ، زاڭ جوبالارىن تالداۋ مەن زاڭداردىڭ ورىندالۋىن قاداعالاۋ فۋنكسياسى جۇكتەلگەن.

قازاقستان تاريحىنداعى تۇڭعىش "قاۋىپسىزدىك كەڭەسى تۋرالى" زاڭ جوباسى بيىلعى جىلدىڭ باسىندا اشىق جاريالانىپ، قاڭتاردا پارلامەنت قاراۋىنا تۇسكەن بولاتىن. بۇدان كەيىن قوعام الگى قۇجات تۋرالى ۇمىتىڭقىراپ قالعانداي بولدى. ءبىراق مامىردىڭ 16-سى كۇنى ءماجىلىس زاڭ جوباسىن ءبىرىنشى وقىلىمدا ماقۇلدادى، ال سوسىن تۋرا ءبىر اپتادان كەيىن – مامىردىڭ 23ء-ى كۇنى جارىتىمدى تۇزەتۋ ەنگىزبەستەن قابىلداپ، سەناتقا جولدادى.

نۇرسۇلتان نازاربايەۆقا تۇڭعىش پرەزيدەنت ءارى "ۇلت كوشباسشىسى - ەلباسى" رەتىندە قاۋىپسىزدىك كەڭەسىنە ءومىر بويى ءتوراعا بولۋ قۇقىعىن بەرۋ ءارى بولاشاق (ازىرشە گيپوتەتيكالىق) پرەزيدەنتتى قاۋىپسىزدىك كەڭەسىنىڭ "قاتارداعى" مۇشەسى رەتىندە وعان باعىنىشتى ەتۋ - زاڭ جوباسىنىڭ ەڭ نەگىزگى تارماعى دەۋگە بولاتىن سياقتى.