"تۇلپار ءمىنىپ، تۋ العان!" ءدال وسىنداي اتاۋمەن الماتىلىق وقۋشىلار اراسىندا 10 كۇن بۇرىن باتىرلار جىرىن جاتقا ايتۋدان بايقاۋ باستالعان بولاتىن. وسى قىسقا عانا ۋاقىت ىشىندە سايىستا ب ا ق سىناعىسى كەلگەن 1300-دەن استام بالا ءوتىنىم بەرىپ ۇلگەرىپتى. ياعني، ەندى كەمى 1300 وقۋشى جاز بويى الپامىس باتىر جىرىن باستان-اياق جاتتايتىن بولادى، دەپ جازادى Qamshy.kz اقپارات اگەنتتىگى. 

ايتا كەتەيىك، "رۋحاني جاڭعىرۋ" باعدارلاماسى اياسىندا ءوتىپ جاتقان بايقاۋدى الماتى قالاسى اكىمدىگىنىڭ قولداۋىمەن R-Media كومپانياسى ۇيىمداستىرىپ وتىر. جوبا جەتەكشىلەرىنىڭ ايتۋىنشا، بايقاۋعا قىزىعۋشىرۋلىق تانىتىپ، ونىڭ اۋقىمدى وتۋىنە نيەت ءبىلدىرىپ جاتقان ۇيىمداردىڭ قاتارى ارتا باستاپتى. سولاردىڭ ءبىرى - ۇلتتىق اۋدارما بيۋروسى. اتالعان قوعامدىق قور بۇگىندە مەملەكەت باسشىسىنىڭ "جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق" جوباسىن جۇزەگە اسىرىپ كەلەدى. ەندى باتىرلار جىرلارىنىڭ بالالار اراسىندا كەڭىنەن تارالۋىنا ۇلەس قوسپاق نيەتتە.

ال، الماتىلىق بالالاردىڭ ءدال بۇلايشا بەلسەندىلىك تانىتۋى بەكەر ەمەس. بايقاۋدى جەڭگەن وقۋشىعا 1 500 000 تەڭگە اقشالاي سىيلىق بەرىلەدى. تيىسىنشە، ەكىنشى ورىنعا - 1 000 000، ءۇشىنشى ورىنعا - 500 000 مىڭ تەڭگە جۇلدە تاعايىندالعان. سونداي-اق، ولاردى جىر سايىسىنا دايىنداعان ۇستازدارى دا نازاردان تىس قالماق ەمەس. جۇلدەلى ورىن العان ءاربىر وقۋشىنىڭ ءمۇعالىمى انگليانىڭ وكسفورد قالاسىنا بارىپ، ءتىل ءبىلىمىن جەتىلدىرەتىن مەكتەپتە اعىلشىن ءتىلىن ۇيرەنىپ كەلەدى.

ايتا كەتەيىك، بايقاۋ الماتىداعى ورتا ءبىلىم بەرەتىن بارلىق مەكتەپتەردىڭ 6-10 سىنىپ ارالىعىندا وقيتىن وقۋشىلارى اراسىندا وتەدى. جوبانى الماتى قالاسى اكىمدىگىنىڭ قولداۋىمەن R-Media كومپانياسى ۇيىمداستىرىپ وتىر.

- بايقاۋدى جاريالاعانىمىزعا ساناۋلى كۇن وتسە دە قاتىسۋشىلاردىڭ سانى وتە كوپ. قازىرگى تاڭدا 1300-دەن استام وقۋشى ءوتىنىم بەرىپ ۇلگەردى جانە بۇل سيفرا ءالى دە ءوسۋى مۇمكىن. قاتىسۋشىلار ەندى 3 اي جازدىق كانيكۋلىندا "الپامىس باتىر" جىرىن باسىنان اياعىنا دەيىن جاتتاۋلارى ءتيىس. قىركۇيەك ايىنىڭ باسىندا اۋداندىق ىرىكتەۋ كەزەڭىن وتكىزىپ، ايدىڭ اياعىندا قالالىق دەڭگەيدەگى بايقاۋدىڭ ناتيجەسىن شىعارامىز، - دەيدى جوبانى ۇيىمداستىرۋشىلار.

جالپى، بايقاۋ 2 دەڭگەيدەن تۇرادى: اۋداندىق جانە قالالىق. اۋداندىق سايىستا ۇزدىك شىققان ءۇش وقۋشى قالالىق بايقاۋدا ب ا ق سىنايدى. ياعني، الماتىداعى 8 اۋداننان ىرىكتەلىپ الىنعان 24 وقۋشى جۇلدەلى ورىنداردى ءوزارا ساراپقا سالادى. باستى ماقسات - بالالار اراسىندا كىتاپ وقۋدى، ونىڭ ىشىندە قازاق حالقىنىڭ باتىرلىق ەپوستارىن ناسيحاتتاۋ، وسكەلەڭ ۇرپاقتىڭ شىعارماشىلىق جانە زياتكەرلىك قابىلەتىن دامىتۋعا جاعداي جاساۋ.