ومبۋدسمەن زاعيپا بالييەۆا وسى ارقىلى ۇل-قىزدار اراسىنداعى ءسۋيسيدتى ازايتپاق ويدا، دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە جاساي وتىرىپ.
ەلىمىزدە 12 جاسقا دەيىنگى بالانى قاراۋسىز قالدىرۋعا زاڭمەن تىيىم سالىنۋى مۇمكىن. ويتكەنى جاسوسپىرىمدەر اراسىندا ءولىم-جىتىم ءورشىپ تۇر. بىلتىردىڭ وزىندە جۇزدەگەن ۇل-قىز وزىنە قول سالىپ ومىرىمەن قوش ايتىسقان. بەيبىت كۇندە بالالار نەگە اجال قۇشىپ جاتىر؟
بالالاردى قورعاۋ مەرەكەسى قارساڭىندا ومبۋدسمەن زاعيپا بالييەۆا تىم بەلسەندى. ماجىلىسكە تەك، بايانداماسىن عانا ەمەس، وزىنە قول سالماق بولعان 15 جاستاعى قىزدى دا ەرتە كەلىپتى. بەت ءجۇزىن ماسكامەن جاسىرعان ءجاسوسپىرىمنىڭ كورگەن قورلىعى جينالعانداردىڭ جۇرەگىن شىمىرلاتتى.
اكە-شەشەم 5 جىل بۇرىن قايتىس بولدى. وسى ۋاقىتقا دەيىن اپكەمنىڭ قولىندا تۇردىم. ءبىراق ءومىر سۇرگىم كەلمەدى. ءبىر كۇنى مەكتەپتە قيىندىقتار بولىپ، سۋيسيد جاسايمىن دەپ شەشتىم. ءبىراق، قولىم بارمادى. كەيىن 111-گە ياعني سەنىم تەلەفونىنا قوڭىراۋ شالدىم. ونداعى پسيحولوگتار ءومىرىمدى ساقتاپ قالدى”، – دەيدى ول.
دەپۋتات ءارى ومبۋدسمەن ولىمنەن امان قالعان قىزدىڭ ءومىرىن مىسال ەتىپ، ءسۋيسيدتىڭ ءورشىپ تۇرعانىن جاسىرعان جوق. ستاتيستيكا راسىمەن ادام شوشىتادى. ەل امان، جۇرت تىنىشتا قازاقستان بويىنشا 5 مىڭنان استام بالا ءتۇرلى وقىس وقيعالاردان كوز جۇمعان. ماسەلەن، بىلتىر ەلىمىزدە 26 ءجاسوسپىرىم قاندىقول قاسكويلەردىڭ قولىنان مەرت بولسا، تاعى 136-سى جالعىزدىق، ىشكى كۇيزەلىس پەن ومىرىندەگى ءتۇرلى قيىندىقتاردىڭ كەسىرىنەن وز-وزىنە قول سالعان. ءسۋيسيدتىڭ سەبەبىن وسىلاي تۇسىندىرگەن بالييەۆا اتا-انالارعا بالالارىنىڭ كىمدەرمەن دوس ەكەنىن، ۋاقىتىن قالاي وتكىزەتىنىن ۇنەمى باقىلاۋدا ۇستاۋ كەرەكتىگىن ايتتى.
“كوبى سۋعا كەتىپ نەمەسە كولىك اپاتىنا ءتۇسىپ كوز جۇمدى. ال 100-دەن استامى تەرەزەدەن قۇلاپ ولگەن. وسىنداي قايعىلى جاعدايدى بولدىرماۋ ءۇشىن تەرەزە شىعاراتىن كومپانيالارمەن كەلىسسوز جۇرۋدە. ياعني، ولار شىبىن-شىركەي، ماسا وتكىزبەيتىن تورمەن قوسا، ۇل-قىزداردى قۇلاتپايتىن قورعان قويۋى ءتيىس”، – دەيدى بالييەۆا.
ءارى دەپۋتات بالالار كودەكسىن قابىلداپ، 12 جاسقا دەيىنگى جەتكىنشەكتەردى ۇيدە جالعىز قالدىرۋعا زاڭمەن تىيىم سالۋدى ۇسىندى. ەگەر قابىلدانىپ جاتسا، جاۋاپسىز اتا-انالار جاپپاي جازالانباق. ءبىراق، بۇدان ماسەلە شەشىلە قويۋى ەكىتالاي. ويتكەنى، ۇل-قىزداردان كوز الماي كۇنى بويى باقىلاۋ مۇمكىن ەمەس. ءبىر قىزىعى، بۇگىنگى وتىرىستا وڭتۇستىك قازاقستاندا زورلاندى دەلىنگەن 7 جاسار بالانىڭ تاعدىرى مۇلدەم ءسوز بولمادى.
تەك ماجىلىسكە ومبۋدسمەندى قولدايتىن قوعامدىق ۇيىمدار جينالعانداي اسەر قالدىردى. ءتىپتى سولاردىڭ ءبىرى زاعيپا بالييەۆا «اسىل انا» دەپ اتاۋدى ۇسىنىپ، جينالعانداردى تاڭقالدىردى.
ال بالييەۆا وزىنە قاراتا ايتىلعان ۇسىنىسقا قاتىستى جاۋاپ قاتقان جوق. سوعان قاراعاندا «اسىل انا» دەگەن اتاۋدى ۇناتقان سياقتى. جيىندى ىڭ-شىڭسىز وتكىزگەن ومبۋدسمەن بارلىق اتا-اناعا ۇل-قىزىن قورعاۋ ءۇشىن كوبىرەك كوڭىل ءبولىپ، ولارمەن سىرلاسىپ، ۇنەمى سويلەسىپ تۇرۋعا كەڭەس بەردى.
