"نۇر وتان" پارتياسى جاڭعىرۋ اياسىندا ءبىرقاتار تىڭ باستامالاردى قولعا العانى بەلگىلى. سولاردىڭ قاتارىندا ءىت-سىنىپ جانە ءىت-ورتالىقتار اشۋ سياقتى ەلىمىزدى سيفرلاندىرۋ ىسىنە قاتىستى جاڭا پارتيالىق جوبالار بار. بۇگىندە پارتيانىڭ تىكەلەي باستاماسىمەن ەلىمىز بويىنشا 56 ءىت-سىنىپ اشىلىپ ۇلگەردى. بۇل تۋرالى بۇگىن "نۇر وتان" پارتياسى ساياسي كەڭەسىنىڭ كەڭەيتىلگەن وتىرىسىندا ايتىلدى.

ەلباسىنىڭ توراعالىعىمەن وتكەن وتىرىستا «نۇر وتان» پارتياسىن جۇيەلى تۇردە جاڭعىرتۋ جانە قازاقستان رەسپۋبليكاسى پرەزيدەنتىنىڭ بەس الەۋمەتتىك باستاماسىنىڭ جۇزەگە اسىرىلۋىن قوعامدىق باقىلاۋدى ۇيىمداستىرۋ ماسەلەلەرى قارالدى.

وسىعان وراي پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ پارتيالىق جاڭعىرۋ اياسىندا اتقارىلعان جۇمىستار جونىندە ەسەپ بەرىپ، بايانداما جاسادى. ونىڭ ايتۋىنشا، پارتيا ەلىمىزدەگى "سيفرلى قازاقستان"، "رۋحاني جاڭعىرۋ" باعدارلامالارىنا اتسالىسۋعا، شاعىن جانە ورتا بيزنەستى دامىتۋعا قاتىستى 22 جاڭا جوبانى قولعا العان.

– الداعى ءۇش جىلدا ەلىمىزدە تەگىن 1000 ءىت-سىنىپ اشۋدى قولعا الدىق. ءقازىردىڭ وزىندە ەلىمىز بويىنشا 56 وسىنداي سىنىپ جۇمىس ىستەپ تۇر. جالپى بيىل 280 سىنىپ اشۋ جوسپارلانىپ وتىر. وسى باستامانىڭ اياسىندا جىلىنا 150 مىڭ بالا باعدارلامالاۋ مەن روبوت تەحنيكالارىنىڭ نەگىزدەرىن ۇيرەنەتىن بولادى"، – دەدى پارتيا ءتوراعاسىنىڭ ءبىرىنشى ورىنباسارى.

ەلباسى بارلىق تىڭ باستامالارعا قولداۋ ءبىلدىرىپ، ۇكىمەت پەن اكىمدىكتەرگە ولاردى ءتيىمدى جۇزەگە اسىرۋعا بەلسەنە قاتىسۋدى تاپسىردى.

ايتا كەتەيىك، وتىرىس جۇمىسىنا ساياسي كەڭەس مۇشەلەرى – ۇكىمەتتىڭ، پارلامەنتتىڭ، پرەزيدەنت اكىمشىلىگىنىڭ باسشىلىعى، مەملەكەتتىك حاتشى، «نۇر وتان» پارتياسىنىڭ ماجىلىستەگى فراكسياسىنىڭ دەپۋتاتتارى، ورتالىق جانە جەرگىلىكتى مەملەكەتتىك ورگانداردىڭ باسشىلارى، سونداي-اق بەينەكونفەرەنس بايلانىسى ارقىلى بارلىق وبلىس اكىمدەرى، وبلىستىق ءماسليحات حاتشىلارى جانە پارتيا وبلىستىق فيليالدارى ءتوراعالارىنىڭ ءبىرىنشى ورىنباسارلارى قاتىستى.