رەسەيدەگى قازاقستان ەلشىلىگى توميريس بايسافانىڭ ىسىنە قاتىستى رەسمي مالىمدەمە جاسادى. مالىمدەمەدە وقيعا بولعان كۇننەن باستاپ بۇگىنگە جاعداي جازىلعان. توميريس بايسافانىڭ ءىسى ەلشىلىكتىڭ قاتاڭ باقىلاۋىندا.

«13 ساۋىردە ماسكەۋ مەملەكەتتىك حالىقارالىق قاتىناستار ۋنيۆەرسيتەتىنىڭ 4 كۋرس ستۋدەنتى توميريس بايسافا وقۋ عيماراتىنىڭ ءتورتىنشى قاباتىنىڭ تەرەزەسىنەن قۇلاپ ءتۇستى.

سول كۇنى-اق رف-داعى ق ر ەلشىلىگى جەدەل تۇردە قىزدىڭ اتا-اناسىنا جاعدايدى ەستىرتتى. ءوز كەزەگىندە، اتا-اناسى ماسكەۋگە سول كۇنى كەشكە ۇشاتىندارىن ايتتى. ەلشىلىكتىڭ ارالاسۋىمەن قىز عىلىمي زەرتتەۋ ينستيتۋتىنا جەتكىزىلىپ، رەانيماسيا بولىمىنە جاتقىزىلدى. ماسكەۋ قالاسى بويىنشا رف مەملەكەتتىك قاۋىپسىزدىك قىزمەتىنىڭ نيكۋلين اۋدان ارالىق تەرگەۋ باسقارماسىمەن ۇزدىكسىز بايلانىستا بولدىق. رف سىم-گە وقيعانى جان-جاقتى جانە وبەكتيۆتى تەرگەۋ تۋرالى وتىنىشپەن ەلشىلىكتىڭ نوتاسى جولداندى. كونسۋل قىزمەتكەرلەرى اۋرۋحانانى كۇن-تۇن دەمەي كۇزەتۋمەن بولدى. اتا-اناسى ەلگە جەتكەن بويدا ەلشىلىكتىڭ ارنايى كولىگى جىبەرىلدى»، - دەلىنگەن رەسەيدەگى قازاقستان ەلشىلىگىنىڭ مالىمدەمەسىندە.

14 مامىردا مەديسينا ماماندارىمەن كەزدەسۋ ءوتتى. سونىمەن قاتار ىسكە قاتىستى تەرگەۋ جۇمىستارى باستالدى. سول كۇنى ەلشىلىك ۋنيۆەرسيتەت باسشىلىعىمەن كەزدەستى. 16 ساۋىردە تەرگەۋشىلەرمەن كەزدەسۋ ءوتتى. 20 ساۋىردە توميريس بايسافا جاتقان اۋرۋحانانىڭ باس دارىگەرىمەن كەزدەسۋ ءوتتى. مەملەكەتتەر اراسىنداعى كەلىسىم اياسىندا مەديسينالىق كومەك كورسەتۋ ماسەلەسى تالقىلاندى. قىزدىڭ اناسى جاننا احمەتوۆا ءتوميريستىڭ جاعدايىمەن تولىق تانىسقان.

3 مامىردا توميريس بايسافا قايتىس بولدى.

4 مامىردا سوت-مەديسينالىق ساراپتاما جۇرگىزىلدى. سول كۇنى ساعات 15.00-دە قىزدىڭ دەنەسىن قازاقستانعا جىبەرۋ بويىنشا قۇجاتتار ازىرلەندى. توميريس بايسافانىڭ اتا-اناسىنا ادۆوكات ۇسىنىلدى. ادۆوكات ەلشىلىكپەن 10 جىلدان بەرى جۇمىس ىستەپ كەلەدى.

17 مامىردا تەرگەۋشىلەرمەن كەزدەسۋ ءوتتى، كەزدەسۋدە تەرگەۋ شارالارىنىڭ جالعاسىپ جاتقانى انىقتالدى.

18 مامىردا رەسەي تەرگەۋ كوميتەتى باسقارماسىنىڭ ماسكەۋ بويىنشا باسشىسىمەن كەزدەسۋ ءوتتى. وندا توميريس بايسافانىڭ وقۋ ۇزدىگى بولعاندىعى، جاعدايى جاقسى وتباسىنان ەكەندىگى جانە مۇعالىمدەرمەن، دوستارىمەن، اتا-اناسىمەن جاقسى قارىم-قاتىناستاعى بويجەتكەن ەكەنى حابارلاندى. ەلشىلىكتىڭ ايتۋنىشا، قىزدىڭ اتا-اناسى بار جاعدايدان ۋاقىتىلى حاباردار بولىپ وتىرادى.