Boxrec اقپاراتى بويىنشا وتانداسىمىز 6 ماۋسىم كۇنى ۆەنگر بوكسشىسى گابور گوربيچپەن جۇدىرىقتاسادى، دەپ حابارلايدى vesti.kz.

جەكپە-جەك لوندونداعى "York Hall" ارەناسىندا وتەدى. استانا ۋاقىتىمەن تۇنگى (6-نان 7 ماۋسىمعا قاراعان ءتۇنى) 01:55-تە باستالاتىن كەزدەسۋدى "حابار" ارناسى تىكەلەي ەفيردە كورسەتەتىن بولادى. جارتىلاي ورتا سالماقتا وتەتىن كەزدەسۋ 6 راۋندقا جوسپارلانعان.

گابور گوربيچ كاسىپقوي بوكستاعى مانسابىن 2012 جىلى باستاعان. وسىعان دەيىن 35 جەكپە-جەك وتكىزگەن. 24 كەزدەسۋىندە جەڭىسكە جەتىپ، 11 رەت ۇتىلعان. 8 بىردەي ەلدە شارشى الاڭعا شىققان. سوڭعى رەت 21 ءساۋىر كۇنى وزبەك بوكسشىسى شاحرام گياسوۆپەن قولعاپ ءتۇيىستىرىپ، تورەشىلەر شەشىمىمەن ەسە جىبەرگەن. ال شاحرام بولسا ريوداعى وليمپيادا ويىندارىنىڭ فينالىندا دانياردان جەڭىلگەن بولاتىن.

"York Hall" ورتالىعىندا وتەتىن بوكس كەشىنىڭ باستى جەكپە-جەگىندە چەمپيوندىق اتاق ءۇشىن لوۋرەنس وكولي (8-0، 6 كو) مەن ليۋك ۋوتكينس (13-0، 9 كو) جۇدىرىقتاسادى.

27 جاستاعى وتانداسىمىز كاسىپقوي بوكستاعى ءبىرىنشى كەزدەسۋىن 28 ءساۋىر كۇنى وتكىزدى. نيۋ-يوركتە وتكەن بوكس كەشىندە امەريكالىق بوكسشى نوا كيدتى 3 راۋندتا تەحنيكالىق نوكاۋتپەن ۇتتى.

دانيار ەلەۋسىنوۆ كاسىپقوي بوكسقا تۇبەگەيلى ناۋرىز ايىنىڭ باسىندا اۋىستى. وعان دەيىن ءبىر رەت بارۋعا بەل بۋعانمەن، رەتى كەلمەگەن ەدى. ۇلىبريتانيالىق پروموۋتەر ەددي حيرنمەن ءۇشجىلدىق كەلىسىمشارتقا قول قويىپ، كاسىپقوي بوكستاعى مانسابىنا جول اشىلدى. قازىرگى تاڭدا ەددي حيرن باسقاراتىن كومپانيا قۇرامىندا اسا اۋىر سالماقتا WBA Super، IBF جانە IBO چەمپيوندىق اتاقتارىنا يە ەنتوني دجوشۋا بار. سونداي-اق بريتاندىق پروموۋتەر رايان بارنەتت (18-0، 9 كو) (WBA Super جانە IBF)، دجەيمي ماكدوننەلل (29-2-1، 13 كو) (WBA)، حاليد يافاي (23-0، 14 كو) (WBA Super)، كەلل برۋك (37-2، 26 كو)، دەنيەل دجەيكوبس (33-2، 29 كو) سىندى بوكسشىلارمەن جۇمىس جاسايدى.