قحر ءتوراعاسى شي جين پيڭ قازاقستان پرەزيدەنتى نۇرسۇلتان نازاربايەۆقا العىسىن ءبىلدىردى، دەپ حابارلايدى Qamshy.kz اقپارات اگەنتتىگى.
«ءبىز ادامزاتتىڭ ورتاق تاعدىرىن قالىپتاستىرىپ، جارقىن بولاشاققا جەتەلەۋ جولىندا قازاقستانمەن بىرگە جۇرۋگە دايىنبىز. مەن قازاق-قىتاي دوستىق كەمەسىن سىزبەن بىرگە جۇرگىزۋگە دايىنمىن»، - دەدى شي جين پيڭ.
ءوز كەزەگىندە مەملەكەت باسشىسى جۇڭگو ءتوراعاسىنا العىسىن ءبىلدىردى.
«مەن قىتايعا كەلەردە سىزبەن كەزدەسەتىنىمە ىشتەي تولقىپ تۇرامىن. ءسىزدىڭ ماعان دەگەن ىستىق ىقىلاسىڭىز بەن سەنىمىڭىز كوڭىلىمدى قۋانتادى. وسى مەملەكەتتىك ساپارعا شاقىرتۋ جىبەرگەنىڭىز ءۇشىن سىزگە العىسىم زور. ادەتتەگىدەي مەنى زور سالتاناتپەن قابىلدادىڭىز. وسى مۇمكىندىكتى پايدالانا وتىرىپ، ءسىزدى جوعارى مەملەكەتتىك لاۋازىمعا قايتا سايلانۋىڭىزبەن جانە الەم تاريحىندا ەلەۋلى ورىنعا يە جۇڭگو كومپارتياسىنىڭ 19 سەزىن ءساتتى وتكىزۋىڭىزبەن شىن جۇرەكتەن، دوستىق كوڭىلمەن قۇتتىقتاعىم كەلەدى»، - دەدى نۇرسۇلتان نازاربايەۆ.
ايتا كەتەيىك، بەيجىڭگە بارعان نازاربايەۆتى سالتاناتتى تۇردە قابىلدادى. بەيجىڭدەگى حالىق جينالىسى ءۇيىنىڭ الدىندا ساپ تۇزەگەن اسكەريلەر قازاقستاننىڭ مەملەكەتتىك ءانۇرانىن وركەسترمەن ورىنداپ، نۇرسۇلتان نازاربايەۆقا زور قۇرمەت كورسەتتى.
بۇل – ەكى ەل باسشىسىنىڭ 18ء-شى رەت جۇزدەسۋى.
ساپار بارىسىندا جۇڭگو حالىق رەسپۋبليكاسىنىڭ ءتوراعاسى شي جين پيڭمەن، جۇڭگو حالىق رەسپۋبليكاسى مەملەكەتتىك كەڭەسىنىڭ پرەمەرى لي كەسيانمەن، جۇڭگو حالىق رەسپۋبليكاسى بۇكىلقىتايلىق حالىق وكىلدەرىنىڭ جينالىسىنىڭ تۇراقتى كوميتەتىنىڭ ءتوراعاسى لي چجانشۋمەن جوعارى دەڭگەيدەگى كەزدەسۋلەر وتكىزۋ، سونداي-اق قازاقستان مەن قىتايدىڭ ىسكەر توپتار وكىلدەرىمەن جۇزدەسۋ جانە ءبىرقاتار ەكى جاقتى قۇجاتتارعا بىرلەسە قول قويۋ جوسپارلانىپ وتىر.
