2018 جىلدىڭ 6 ماۋسىمىندا الماتى قالاسىنداعى جازۋشىلار كىتاپحاناسىندا ەلوردانىڭ 20 جىلدىعىنا وراي «استانا – تاۋەلسىز قازاقستاننىڭ سيمۆولى» اتتى دوڭگەلەك ۇستەل ءوتتى. باسقوسۋعا مۇرىندىق بولعان «ەل-شەجىرە» قوعامدىق قورى مەن الماتى قالاسى ىشكى ساياسات باسقارماسى. ءىس-شارانىڭ باستى ماقساتى – استانانىڭ قازاقستاننىڭ دامۋىنا قوسقان ۇلەسىن جانە اتقارىلعان اۋقىمدى ىستەرىن بايانداۋ. ەلوردانىڭ قالىپتاسۋ تاريحىنا باعا بەرۋ.
جاس قالانىڭ ەكى ون جىلدىق مەرەيتويىنا وراي ۇيىمداستىرىلعان جيىنعا ق ر ۇلتتىق مەملەكەتتىك كىتاپ پالاتاسىنىڭ ديرەكتورى الىبەك اسقاروۆ، قازاقستاننىڭ ەڭبەك سىڭىرگەن قايراتكەرى اسىلى وسمان، جۋرناليست، جازۋشى قانات ءابىلقايىر، قايىم مۇحامەدحانوۆ اتىنداعى ءبىلىم جانە مادەنيەت ورتالىعى قوعامدىق قورىنىڭ ديرەكتورى دينا مۇحامەدحان سىندى ءبىرقاتار قوعام قايراتكەرلەرى، ۇەۇ جانە ب ا ق وكىلدەرى قاتىستى.
اتالمىش شارا جازۋشىلار كىتاپحاناسىنىڭ مەڭگەرۋشىسى ەلەنا اعايسا حانىمنىڭ العى سوزىمەن باستالىپ، «ەل-شەجىرە» قوعامدىق قورىنىڭ ءتوراعاسى داۋلەت ءاشىمحاننىڭ كىرىسپە سوزىمەن جالعاسىن تاپتى. سونداي-اق، الىبەك اسقاروۆ ەلوردانىڭ كەشەگى مەن بۇگىنىن سالىستىرىپ، ءارقيلى ەستەلىگىن ازىلمەن اڭگىمەلەپ بەردى. استانانى ارقاعا كوشىرگەنى دۇرىس بولعاندىعىن تىلگە تيەك ەتتى. ول «استانا نەبارى 20 جىلدا جاڭا قالاعا اينالىپ ۇلگەردى. بۇرىن شەت ەلدەرگە تاڭ قالىپ قاراساق، بۇگىندە سولارمەن تەڭەسىپ، يىق تىرەسە الدىق. كۇن ساناپ دامىعان قالامىز ءالى تالاي الىپ قالانىڭ الدىن ورايتىنىنا كامىل سەنەمىن» – دەپ ءسوزىن تۇيىندەدى.
قوعام قايراتكەرى اسىلى وسمان «ەلباسىنىڭ باستاماسىنا، تاپقىرلىعىنا، تاباندىلىعىنا ەشكىم كۇماندانعان ەمەس. ول استانانى كوشىرۋ بارىسىندا وتكەندى ەسكەرىپ، بۇگىنىن ويلاپ، بولاشاققا باياندى جوسپار جاسادى. تۇسىنىگى مول، سانالىلار ءبىر اۋىزدان قولدادى. كۇدىكتەن ءۇمىت باسىم بولىپ، سەنىم اقتالدى. مىنە بۇگىندە گۇلدەنگەن، ەكونوميكاسى قۋاتتى مەگاپوليس اتاندى» – دەدى.
دوڭگەلەك ۇستەل بارىسىندا ستۋدەنتتەر ءىس-شاراعا قاتىسۋشىلارعا استانا قالاسىنىڭ تاريحى تۋرالى سۇراقتار قويىپ، تۇشىمدى جاۋاپتار الدى. بۇعان قوسا، كەلگەن قوناقتار كىتاپحاناعا ەستەلىك كىتاپتارىن سىيلادى. جيىندى اقىن، جىراۋ التىنبەك يبراگيموۆ ءوزىنىڭ «استاناعا ارناۋ» جىرىمەن قورىتىندىلادى.
