داريا ءومىر دارمەنسىز پەندەنىڭ پىكىرىمەن ساناسقان با؟ بۇگىنگى ءبىزدىڭ كەيىپكەر – ەركەن جۇندىبايەۆ تابانداپ تۇرعان تارشىلىقتى تۇبىندە جەڭەمىن دەگەن ۇراندى العا تارتىپ ءومىر ءسۇرىپ جاتىر. ول قولبايلاۋ بولعان سۇرىقسىز كۇندەردەن قۇتىلعىسى كەلەدى.
«وسىدان بەس اي بۇرىن جۇبايىم داريحامەن بىرگە استاناداعى جۇمىسپەن قامتۋ ورتالىعىنا جۇمىس ىزدەپ باردىم. جەتى بالامدى باعۋىم كەرەك. وسىعان دەيىن تۇراقتى جۇمىسىم بولمادى. بالا-شاعامنىڭ ريزىق-نەسىبەسىن ءار جەردەن ىزدەپ تاپتىم» – دەيدى ول.
ءبىزدىڭ كەيىپكەر بۇگىندە الەۋمەتتىك ءالسىز توپتاردى جۇمىسپەن قامتىپ وتىرعان «GreenTal» كاسىپورنىندا اعاش ۇستاسى قىزمەتىن اتقارادى. ەركەننىڭ قولىنان كەلمەيتىنى جوق. ول جاساعان بۇيىمدار كوپتىڭ سۇرانىسىن تۋعىزىپ ءجۇر.
«مەن وسى جۇمىس ورنىنا كەلگەلى ءتۇرلى جيھاز جابدىقتارىن جاساۋدى ۇيرەندىم. مۇنداعى شەبەرلەر بىر-بىرىنەن اسىپ تۇسەدى. ءبىرى ءپىشىپ كەسسە، ەكىنشىسى ونى وڭدەپ جاتادى. ال مەن جارتىلاي دايىن بولعان ونىمدەردى قۇراستىرامىن. ءتۇرلى تۇسپەن بوياۋدى دا ءوز موينىما الدىم. كاسىپورىن شاعىن بولعانىمەن قوعامعا ۇلكەن پايداسىن تيگىزىپ جاتىر. مەن سەكىلدى الەۋمەتتىك ءالسىز توپ وكىلدەرىنە جۇمىس بەرىپ وتىر. مۇندا تەك جوقشىلىقتان تارىققاندار ەمەس، جارىمجان جاندار دا بار. ءبارىنىڭ كوزدەگەنى – بالا-شاعانىڭ قامى»، - دەيدى ەركەن.
«ەركەننىڭ ەڭ اسىل قاسيەتى – ءوز ىسىنە ادال. مەن ونىڭ جاۋاپكەرشىلىگى مەن تالابىنا ءتانتى بولدىم. ءار ىسىنە تياناقتى. جۇمىسقا ورنالاسقانىنا از ۋاقىت بولسا دا، بىردەن مەڭگەرىپ كەتتى. ەركەننىڭ ەندىگى ماقساتى – ءوزى سەكىلدى جاندارعا قول ۇشىن سوزۋ. كورگەن تۇيگەنىمەن ءبولىسىپ، اعاشتان بۇيىمدار جاساۋدى باسقالارعا دا ۇيرەتۋ»، -دەيدى كاسىپورىن باسشىسى ەمين اسكەروۆ.
استانالىق ءبىزدىڭ كەيىپكەر جىل باسىندا حالىقتى جۇمىسپەن قامتۋ ورتالىعىنا جۇمىس ىزدەپ بارعان ەدى. ايەلى بالا كۇتىمىندە، وتباسىندا وزىنەن باسقا جۇمىسقا قابىلەتتى ادام جوق. وسى رەتتە ورتالىق ماماندارى مەملەكەتتىك اتاۋلى الەۋمەتتىك كومەك جوباسىنا تىركەپ، ەركەننىڭ شاڭىراعىنا قول ۇشىن سوزعان ەدى. اي سايىن جان باسىنا شاققاندا بەرىلەتىن تولەماقىنى تاعايىنداپ، تۇراقتى جۇمىسقا ورنالاستىردى. بۇگىندە استاناداعى جۇمىسپەن قامتۋ ورتالىعى اتاۋلى الەۋمەتتىك كومەك جوباسى اياسىندا 500-دەن اسا مامانعا كومەك كورسەتىپتى.
