استانا قالاسى اكىمدىگى جاستار تەاترىنىڭ اكتەرى،  قازاقستان تۇڭعىش پرەزيدەنتى قورى سىيلىعىنىڭ يەگەرى،  «ۇزدىك اكتەر» نوميناسياسى بويىنشا «ساxناگەر-2018» ۇلتتىق سىيلىعىنىڭ يەگەرى، قىرعىزستان رەسپۋبليكاسى مادەنيەت مينيسترلىگىنىڭ «قۇرمەت گراموتاسىنىڭ» يەگەرى داۋرەن سەرعازين، استانا قالاسىنىڭ 20-جىلدىعىنا ارنالعان «SAMGAU»  VI حالىقارالىق تەاتر فەستيۆالىنىڭ «ۇزدىك ەر ادام بەينەسى» نوميناسياسىن يەلەندى.

تالانتتى ەشكىم جاساپ الا المايدى، بىرەۋدەن سۇراپتا ساتىپ الا المايدى، ول اللادان بەرىلەدى.

داۋرەن سەرعازين جاستار تەاترىنىڭ كوركەمدىك جەتەكشىسى ءارى باس رەجيسسەرى، پروفەسسور، قازاقستاننىڭ ەڭبەك سىڭىرگەن قايراتكەرى نۇرقانات جاقىپبايدىڭ ەڭ مىقتى شاكىرتتەرىنىڭ ءبىرى. ساحنالىق كەيىپكەر بولمىسىن قاز-قالپىندا بەرۋگە ۇمتىلىسىندا  جانر تالعامايتىن اكتەر، بۇگىنگى تاڭدا  ۇستازىنان العان ءتالىمىن كورەرمەنىنە شىنايى جەتكىزە بىلگەن تالانتتى ءارى شەبەر اكتەر.

بۇگىنگى كۇندە قازاقتىڭ تەاتر جانە كينو ونەرىندە ەڭبەگى ءسىڭىپ جۇرگەن ناعىز قايراتكەر.

تەاتر ساحناسىندا بىردە – حلەستاكوۆ، بىردە – ليۋچەنسيو، بىردە  - قوجا، بىردە – ءامىر، بىردە - ارتۋر رولدەرىمەن قالىڭ كورەرمەننىڭ جۇرەگىنەن ورىن الىپ جۇرسە، كينو ونەرىندە الدار كوسە، ءشامشى، ءمادي، ايدار وبرازدارىمەن كەڭ تانىلىپ ءجۇر.