پاۆلودار وبلىستىق اۋىل شارۋاشىلىعى باسقارماسىنا نۇربولات ماقاشيەۆ تاعايىندالدى، دەپ حابارلايدى pavlodarnews.kz.

كادرلىق ءاۋىس-تۇيىس تۋرالى بۇگىن وبلىس اكىمدىگىندە وتكەن اپپاراتتىق جيىندا بەلگىلى بولدى. جاڭا باسشىنى ءوڭىر اكىمى بولات باقاۋوۆ تانىستىردى. ول ءوز سوزىندە نۇربولات ماقاشيەۆ اۋىل شارۋاشىلىعى مينيسترلىگىندە ءبىراز تاجىريبە جيناعانىن اتاپ ءوتتى.

- نۇربولات ماقاشيەۆ ساراپشى، باس ساراپشى، باسقارما باسشىسى، اۋىل شارۋاشىلىعى مينيسترلىگى دەپارتامەنتى ديرەكتورىنىڭ ورىنباسارى بولىپ جۇمىس ىستەگەن، - دەدى اكىم. - كووپەراسيا ماسەلەلەرىنە جەتەكشىلىك ەتكەن. بۇل تاجىريبە جۇمىستا سەپتىگىن تيگىزەدى دەگەن ويدامىن.

نۇربولات ماقاشيەۆ 2003 جىلى شاكارىم اتىنداعى سەمەي مەملەكەتتىك ۋنيۆەرسيتەتىن «ستاندارتتاۋ جانە ازىق-تۇلىك سالاسىن سەرتيفيكاتتاۋ» ماماندىعى، 2010 جىلى «تۇران-استانا» ۋنيۆەرسيتەتىن «زاڭگەر» ماماندىعى بويىنشا، 2016 جىلى «بولاشاق» باعدارلاماسى بويىنشا «شپايەر» اكىمشىلىك باسقارۋ نەمىس ۋنيۆەرسيتەتىنىڭ ماگيستراتۋراسىن بىتىرگەن. 

ەڭبەك  جولىن 2007 جىلى «حالىقارالىق باعدارلامالار ورتالىعى» اق پرەزيدەنتىنىڭ كەڭەسشىسى بولىپ باستاعان. 2008-2018 جىلدارى اۋىل شارۋاشىلىعى مينيسترلىگىندە جۇمىس ىستەگەن.  بۇل قىزمەتكە دەيىن اتالعان ۆەدومستۆو باسشىسىنىڭ ورىنباسارى  لاۋازىمىن اتقارعان.