سەنات ءتوراعاسى ق.ك.توقايەۆتىڭ سۇحباتىنا بايلانىستى سەناتور مۇحتار قۇل-مۇحاممەد ءوز پىكىرىن ءبىلدىردى، دەپ جازادى Qamshy.kz اقپارات اگەنتتىگى.
– قاسىم-جومارت كەمەل ۇلى وتە بايىپتى، بايسالدى ساياساتكەر. مەنىڭشە ول سۇحباتتى باتىس قوعامدىق پىكىرىنىڭ تامىرىن باسۋ ءۇشىن ايتقان سياقتى. ءتىپتى ءوز ىشىمىزدەگى كەيبىر ۇمىتكەرلەردى «سىناۋ» ماقساتىندا جاسالۋى دا ابدەن مۇمكىن. ويتكەنى توقايەۆتىڭ جاۋاپتارى باسىنان اياعىنا دەيىن ەلباسى ساياساتىن قولداۋعا نەگىزدەلگەن. ماحاتحير موحامادتىڭ جاسىنا قاتىستى سىلتەمەنىڭ وزىندە كوپ يشارا بار ەكەنىن بايقاماۋ مۇمكىن ەمەس. سوندىقتان ءاردايىم ءبىزدى سىناپ-مىنەۋگە دايىن تۇراتىن شەتەلدىك اقپاراتتىڭ قاتقىل فورماتىنداعى ءبىر سۇحبات توڭىرەگىندە سونشاما داۋ-داماي تۋعىزۋدىڭ ەش قاجەتى جوق، – دەپ تۇيىندەيدى ءوز پىكىرىن سەناتور مىرزا.
ايتا كەتەتىن بولساق، سەنات ءتوراعاسى توقايەۆ BBC تەلەارناسىنا بەرگەن سۇحباتىندا قازىرگى پرەزيدەنت نازاربايەۆتىڭ قازاقستاندا 2020 جىلى بولۋى ءتيىس پرەزيدەنتتىك سايلاۋعا تۇسپەۋى مۇمكىن ەكەنى تۋرالى ايتقان. وسىدان كەيىن ءبىرقاتار ساياساتكەرلەر توقايەۆ سوزىنە قاتىستى پىكىر بىلدىرگەن بولاتىن. اتاپ ايتقاندا اقپارات جانە كوممۋنيكاسيالار ءمينيسترى داۋرەن ابايەۆ «نازاربايەۆ كەلەسى سايلاۋعا قاتىسسا قازاقستان ودان تەك ۇتاتىن بولادى» دەگەن.
