ق ر ءبىلىم جانە عىلىم ءمينيسترى ەرلان ساعادييەۆ جۋرناليستيكانى 4 جىل وقۋدىڭ قاجەتى جوق دەپ سانايدى. بۇل تۋرالى مينيستر بۇگىن مەديا ءبىلىم بەرۋدى دامىتۋ ماسەلەلەرى جونىندەگى ۆەدومستۆوارالىق كەڭەستە ايتتى، دەپ جازادى Qamshy.kz اقپارات اگەنتتىگى. 

سونىمەن قاتار مينيستر جۋرناليستيكانى 4 جىل وقۋدىڭ قاجەتى جوق دەگەن پىكىرمەن كەلىسەتىنىن جەتكىزدى. 

– مەنىڭشە، ەڭ ءبىرىنشى كەزەكتە جۋرناليست ءوزى جازاتىن سالانىڭ مامانى بولۋى ءتيىس. ەگەر مەديسينا تۋرالى جازاتىن بولسا، وندا دارىگەر بولعانى، ەكونوميكانى جازسا ەكونوميست، بانكير ودان كەيىن جۋرناليست بولعانى جاقسى. جۋرناليستكە ەكونوميكا تۋرالى جازۋدى، اقپاراتتى قالاي دۇرىس بەرۋ كەرەك ەكەنىن  ۇيرەتۋ ەكونوميستكە قاراعاندا الدەقايدا قيىن، - دەدى مينيستر.

ءمينيستردىڭ ايتۋىنشا، قازىرگى ۋاقىتتا قارالىپ جاتقان جاڭا زاڭ جوباسىندا ەكى ماسەلە قاراستىرىلعان.

— ءبىرىنشىسى، ەندىگى ۋاقىتتا 4 جىل وقۋ مىندەتتى ەمەس. 2،5 جىل نەمەسە 8 جىل، قالاعانىڭشا وقۋعا بولادى. ماسەلە ستۋدەنتتىڭ كرەديتتىڭ بەلگىلى ءبىر سانىن جيناعانىنا بايلانىستى. ەكىنشىدەن، ەگەر سەن ەكونوميست بولساڭ ەكىنشى ماماندىعىڭ جۋرناليستيكا بولاتىن جۇيە ەنگىزىلەدى،- دەدى ەرلان ساعادييەۆ.

ەرلان ساعادييەۆتىڭ ايتۋىنشا، ەندىگى ءىس جوعارى وقۋ ورىندارىنا قالىپ وتىر. ولار ءپانارالىق باعدارلاما قۇرۋى ءتيىس. سول كەزدە سالانى تۇسىنەتىن، ساراپتاما جاساي الاتىن، جالپى سالانىڭ مامانى بولاتىن جۋرناليستەر پايدا بولا باستايدى.