قازاقستان رەسپۋبليكاسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى جۋرناليستەر كۇنىنە وراي «مەملەكەتتىك ءتىل جانە ب ا ق» اتتى رەسپۋبليكالىق بايقاۋىنىڭ جەڭىمپازدارىن سالتاناتتى ماراپاتتاۋ ءراسىمىن وتكىزدى، دەپ حابارلايدى Qamshy.kz اقپارات اگەنتتىگى.

Qamshy.kz اقپارات اگەنتتىگىنىڭ ءجۋرناليسى ەركەعالي بولات ۇلى «ۇزدىك سايت ماقالاسى» (سايت ماتەريالدارى بويىنشا) نوميناسياسى بويىنشا ءىى ورىندى يەلەندى.

اتالمىش نوميناسيا بويىنشا ءى ورىندى ارىستانبايەۆ ماديار، ءىىى ورىندى قىمبات ەلتاي قىزى يەلەندى.  جارىلقاپ بەيسەنباي ۇلى گران پري جەڭىمپازى اتاندى. باس جۇلدەنىڭ سىياقىسى - 1 000 000 تەڭگە.

ءىس-شارا  قازاقستان رەسپۋبليكاسى مادەنيەت جانە سپورت ءمينيسترى ارىستان مۇحامەدي ۇلىنىڭ قۇتتىقتاۋ سوزىمەن اشىلدى.

رەسپۋبليكالىق كونكۋرسقا ۇمىتكەر جۋرناليستەردەن 200-گە جۋىق ماتەريال كەلىپ ءتۇستى. ەرەجەگە سايكەس ەل اۋماعىنداعى باق-تا جاريالانعان جۋرناليستىك ەڭبەكتەردىڭ مازمۇنى مەملەكەتتىك ءتىلدىڭ قىزمەت ەتۋ اياسىن كەڭەيتۋ، مارتەبەسىن نىعايتۋ جانە قازىرگى مەملەكەتتىك ءتىلدىڭ احۋالدى تالداۋ جانە وعان مونيتورينگ جۇرگىزۋگە باعىتتالعان.

سالتاناتتى شارادا «ۇزدىك ماقالا» (باسپا ءسوز بويىنشا) نوميناسياسى بويىنشا ءىىى ورىندى ءازىمحان ىبىراي ۇلى، ءىى ورىن قاسىم ازامات ءابىلۇلىنا، ءى ورىندى سافين نۇرلىبەك  يەلەندى. 

«ۇزدىك تەلەباعدارلاما» (تەلەارنا باعدارلامالارى بويىنشا) نوميناسياسى بويىنشا ءىىى ورىن گۇلباقشا اقاجانوۆاعا، ءىى ورىن نارتاي ارالبايۇلىنا، ءى ورىن سەرىك جۇمابەككە بۇيىردى.

«ۇزدىك راديو باعدارلاماسى» (راديو باعدارلامالارى بويىنشا) نوميناسياسى بويىنشا ءىىى ورىندى تالانت ارعىنعالي، ءىى ورىندى امانجۋلوۆا اسەمگۋل، ءى ورىندى ەربول الشىنباي جەڭىپ الدى.