الماتىدا «سانالى ۇرپاق – جارقىن بولاشاق» جەمقورلىققا قارسى جوباسى اياسىندا ءبىلىم بەرۋ سالاسىنداعى جەمقورلىق تاۋەكەلدەرىنىڭ كارتاسى تالقىلاندى. جوعارعى وقۋ ورىندارى، مەكتەپ، كوللەدج وكىلدەرى «SANALY URPAQ» جوبالىق كەڭسەسىنە جينالىپ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ، ءبىلىم باسقارماسىنىڭ جەتەكشىلەرىمەن ءبىلىم بەرۋ مەكەمەلەرىندەگى سىبايلاس جەمقورلىق تاۋەكەلدەرىن جويۋدىڭ امال مۇمكىندىكتەرىن قاراستىردى.

سىبايلاس جەمقورلىق تاۋەكەلدەرى كارتاسىنىڭ جوباسى ءال-فارابي اتىنداعى قازۇۋ جانىنداعى جەمقورلىققا قارسى تەحنولوگيالار عزي تاراپىنان جاسالعان. بۇل قۇجات مەكتەپكە دەيىنگى وقۋ مەكەمەلەرىنەن باستاپ جوعارى وقۋ ورىندارىنداعى باسقارۋ، قارجى-شارۋاشىلىق، ءبىلىم-عىلىم، الەۋمەتتىك-تاربيەلىك سياقتى ءبىلىم بەرۋ سالالارىنىڭ بارلىق قىزمەتىن قامتىعان. جەمقورلىق تاۋەكەلدەرى باعالاناتىن بولسا، وندا شەتەلدىك تاجىريبەگە سۇيەنە وتىرىپ جەمقورلىققا توسقاۋىل قويىلاتىن ءتيىستى تەحنولوگيالار مەن ءبىلىم بەرۋ مەكەمەلەرىنىڭ رەسۋرستارىن ءتيىمدى پايدالانۋ بويىنشا نۇسقاۋلار جاساۋعا مۇمكىندىك تۋادى.

«SANALY URPAQ» جوبالىق كەڭسەسىنىڭ جەتەكشىسى قايىرجان توقىشيەۆ اتاپ وتكەندەي، «جەمقورلىققا قارسى تەحنولوگيالار مەن جەمقورلىق تاۋەكەلدەرى كارتاسىنىڭ كەزەڭدىك جانە جۇيەلىك جۇمىسى بولاشاقتا ءبىلىم بەرۋ مەكەمەلەرىنىڭ جەمقورلىققا قارسى جاساعان قىزمەتىنە قاتىستى بارلىق دەڭگەيدەگى رەيتينگىلىك باعا كورسەتكىشتەرى مەن ناقتى مونيتورينگ كريتەريلەرىن جاساۋعا سەپتىگىن تيگىزەدى». جەمقورلىققا قارى جوبالىق كەڭسەسى ءوزىنىڭ رەيتينگتىك-مونيتورينگ قىزمەتىن ساندىق فورماتىنا شىعارۋدى جوسپارلاۋدا. ونىڭ نەگىزگى اجىراماس بولىگى الەۋمەتتىك ساۋالنانامالار بولىپ تابىلادى جانە وسى جولى وتكەن وتىرىستا ونىڭ ادىس-تاسىلدەرى كوپشىلىككە ۇسىنىلىپ تانىستىرىلدى.

جوعارىدا اتالعان قۇرالداردى ەنگىزۋ ءار ءبىلىم مەكەمەسىندەگى سىبايلاس جەمقورلىققا قارسى قىزمەتتى شىنايى باعالاۋعا مۇمكىندىك بەرەدى.

ولاردىڭ بارلىعى جەمقورلىققا قارسى ساياساتتىڭ تيىمدىلىك دارەجەسى بويىنشا سارالاناتىن بولادى. رەيتينگ ناتيجەسى بويىنشا الماتى قالاسىنىڭ كارتاسىندا ءبىلىم سالاسىنداعى ەڭ از جانە ەڭ كوپ جەمقورلىق تاۋەكەلدەر ايماعىن انىقتاۋ ۇيعارىلۋدا. اتالمىش جوبا ۇيىمداستىرۋشىلارىنىڭ ويىنشا،  سىبايلاس جەمقورلىققا قارسى رەيتينگ بارلىق ءبىلىم مەكەمەلەرى ءۇشىن وزدەرىنىڭ جەمقورلىققا قارسى ساياساتىن جۇزەگە اسىرۋعا دەگەن پارمەندى ىنتالاندىرۋ بولماق. جيىن بارىسىندا ءال-فارابي اتىنداعى قازۇۋ-داعى سىبايلاس جەمقورلىققا قارسى تەحنولوگيانىڭ تاجىريبەسى تالقىلاندى، مۇندا 2011 جىلدان بەرى «جەمقورلىقتان تىس ۋنيۆەرسيتەت» جوباس جۇزەگە اسۋدا.

جيىن بارىسىندا ۋنيۆەرسيتەتتىڭ ناتيجەگە قول جەتكىزۋگە باعىتتالعان باسقارۋدى ىسكە اسىرۋداعى ينديكاتيۆتىك جوسپارلاۋى، وقىتۋشىلار قىزمەتىنىڭ رەيتينگتىك تۇرعىدان باعالانىپ ەڭبەكتىڭ ديففەرەنسيالدى تولەنۋى، ءبىرىڭعاي اقپاراتتىق-ساراپتامالىق جۇيە مەن ۋنيۆەرسيتەتتەگى بيزنەس پروسەستەردىڭ ساندىق تەحنولوگيالارىن جاساۋ سياقتى جۇمىستار جينالعان قاۋىمنىڭ قىزىعۋشىلىعىن تۋدىردى.