الماتىدا «سامۇرىق-قازىنا» ۇلتتىق ءال-اۋقات قورى» اق باسقارما ءتواعاسى احمەتجان ەسىموۆتىڭ باسشىلىعىمەن جابىق پىشىندەگى جاڭا «تۇركسىب» قوسالقى ستانسياسى ىسكە قوسىلدى. جاڭا ەنەرگيا نىسانىنىڭ ىسكە قوسىلۋى - 2008 جىلى باستالعان الماتى قالاسىن ەلەكترمەن ورنىقتى جابدىقتاۋ باعدارلاماسىن تولىق اياقتاۋعا مۇمكىندىك بەردى.

«تۇركسىب» قوسالقى ستانسياسى ترانسفورماتورلىق قۋاتتى 30 مۆا-عا ارتتىرادى جانە تۇركسىب اۋدانىنىڭ ورتالىق بولىگىن، سونداي-اق «قول جەتىمدى باسپانا» باعدارلاماسى اياسىندا سالىنعان «جاس قانات» جاڭا شاعىن اۋدانىن، «الماتى اگلومەراسياسىنىڭ 2030 جىلعا دەيىنگى ءوڭىرارالىق سحەماسى» باعدارلاماسى بويىنشا قالاعا قوسىلعان «قايرات» شاعىن اۋدانىنىڭ نەگىزگى بولىگىن ەلەكترمەن قامتاماسىز ەتەدى. 

«سامۇرىق-قازىنا» ءۇاق» اق باسقارما ءتوراعاسى احمەتجان ەسىموۆ ەلىمىزدىڭ ەڭ ءىرى مەگاپوليسىن ەنەرگيامەن ءۇزىلىسسىز قامتاماسىز ەتۋ ماسەلەسىنە ۇلكەن ءمان بەرىلەتىنىن، ەندىگى جالعىز مىندەت – وسى قۋات كوزدەرىن دۇرىس پايدالانۋ ەكەنىن اتاپ ءوتتى.

«مەملەكەت باسشىسى وسىدان ون جىل بۇرىن العا قويعان مىندەتتەردىڭ ءبىرى – الماتى قالاسىن ەلەكترمەن ورنىقتى جابدىقتاۋ بولاتىن. بۇگىن، قوسالقى ستانسيانىڭ ىسكە قوسىلۋىمەن، بۇل ماسەلە تولىق شەشىلدى.  ەندىگى قالعان جالعىز مىندەت – وسى قۋات كوزدەرىن دۇرىس پايدالانۋ، ويتكەنى جۇمسالعان 20 ملرد تەڭگەدەن استام قاراجات ءتيىمدى جۇمىس ىستەۋى كەرەك»، - دەدى احمەتجان ەسىموۆ.

ءوزىنىڭ سانى جاعىنان 33ء-شى قوسالقى ستانسيا ىسكە قوسىلعاننان كەيىن، الماتى قالاسىنىڭ شەگىندە ەنەرگيامەن جابدىقتاۋ كارتاسى  تولىعىمەن «جاسىل تۇسكە» بويالاتىنىن اتاپ وتەيىك، بۇل قالا اۋماعىندا ەلەكتر ەنەرگياسى تولىق قول جەتىمدى ەكەنىن بىلدىرەدى.

«ەستەرىڭىزدە بولار، وسىدان 10 جىل بۇرىن جارىقتى كەزەك-كەزەگىمەن، اۆاريالىق تۇردە ءسوندىرىپ، ەلەكترمەن ورنىقتى جابدىقتاي المايتىنبىز، بۇل قالانىڭ جانە بيزنەستىڭ دامۋىنا كەدەرگى كەلتىرىپ، حالىقتىڭ الەۋمەتتىك جاعدايىنا اسەر ەتەتىن»، - دەپ اتاپ ءوتتى ا.ەسىموۆ. 

سونداي-اق، احمەتجان ەسىموۆ الماتى قالاسىنا جۇمىس ساپارى بارىسىندا قالاداعى ەنەرگەتيكالىق كەشەننىڭ ورنىقتى دامۋى ءۇشىن ۇلكەن ماڭىزعا يە «الاتاۋ جارىق كومپانياسى» اق-نىڭ ەنەرگيا وبەكتىلەرىندە بولدى. ا.ەسىموۆ جۇكتەمەنى پس-220/110/10 كۆ №131ا «تاۋلى قىرات» قوسالقى ستانسياسىنان پس-220/110/10-10 كۆ №160ا «ەرمەنساي» قوسالقى ستانسياسىنا اۋىستىرۋ جۇمىستارىمەن تانىستى. بۇل جوبا «تاۋلى قىرات» قوسالقى ستانسياسى ورنالاسقان اۋماقتا لاي كوشكىنى بولعان جاعدايدا، قوسالقى ستانسيانىڭ قيراۋ جانە تۇتىنۋشىلاردىڭ ەلەكتردەن جاپپاي اعىتىلۋ ءقاۋپى تۋىنداۋىنا بايلانىستى ىسكە اسىرىلۋدا. اۆاريالىق جاعدايلاردى بولدىرماۋ ماقساتىندا، جۇكتەمەنى «گورنىي گيگانت» شاعىن ستانسياسىنان «ەرمەنساي» قوسالقى ستانسياسىنا اۋىستىرۋ تۋرالى شەشىم قابىلدانعانىن ايتا كەتەيىك. 

2011 جىلى «ەرمەنساي» قس ىسكە قوسىلۋى الماتى قالاسىندا قىسقى ازيادا-2011 ويىندارى وتكىزىلۋىنە ورايلاستىرىلعان بولاتىن. جۇكتەمەلەردى اۋىستىرۋ جوباسىن اياقتاۋ 2018 جىلعا جوسپارلانعان، سودان كەيىن «تاۋلى قىرات» قس جويىلادى.