ءار ءبىر ەلىم، جەرىم، حالقىم، وتانىم دەگەن ازامات – ۇلتىنا قىزمەت ەتۋگە مىندەتتى. قىزمەتتىڭ ءتۇرىن تالداۋ – ءوز مۇمكىندىگى مەن رۋحىنا بايلانىستى. الايدا افينا مەكتەبى مەن ماحاتما گاندي ساباعىنا ۇڭىلسەك، قاراپايىم جانداردىڭ بارلىعى دا ۇلتىنا قىزمەت ەتىپ، ۇلتشىلدىق رۋحىن كورسەتە الادى.

ەجەلگى افينا ازاماتتارىنا ەللان تىلىندە سويلەي المايتىندارمەن نەكەگە تۇرۋعا زاڭ جۇزىندە تىيىم سالىنعان. بۇل زاڭ تالابىن ورىنداۋ گرەك ءپاتريوتيزمى رەتىندە قابىلدانعان جانە مەملەكەتتىك دارەجەدە ناسيحاتتالىپ، بۇلجىتپاي ورىندالعان. ولاي بولسا، ۇلتشىل بولامىن دەگەن قازاق ازاماتى مەن قازاق ازماتشاسى نە ىستەۋ كەرەك؟!

ۇلى ماحاتما گاندي «اعىلشىن وتارشىلدارىمەن كۇرەسۋدىڭ جولى – اعىلشىننىڭ تاۋارلارىن ەشقاشان ساتىپ الماۋ» دەپ جاريالادى. تاۋارلارى وتپەگەن اعىلشىن كاسىپكەرلەرى جاپپاي بانكروتتىققا ۇشىراپ، اقىرى، ءۇندى جەرىنەن كەتۋگە ءماجبۇر بولعان.

قازاقستاندا نە كوپ، شەتەل كومپانيالارى، توۆارلارى كوپ. ولاي بولسا ءار ءبىر ۇلتىن سۇيگەن وتباسى، ۇلكەن-كىشى، وزگەنىڭ قازانىنداعى قاڭسىعىنا مويىن بۇرماي، ءوزىنىڭ تاڭسىعىنا – وتاندىق ونىمىنە قول سوزسىن. وتاندىق ءونىمدى وندىرۋگە، ساتۋعا، ساتىپ الۋعا ءمان بەرسىن!

ۇلتشىلدىق تۋرالى تەرەڭ پىكىر ايتقان ادامنىڭ ءبىرى – دجاۆاحارلال نەرۋ. ول ءوزىنىڭ «ءۇندىستانىن اشۋ» دەگەن ەڭبەگىندە: «...ۇلتشىل­دىق – حالىقتاردىڭ قوزعاۋشى كۇشى، ونىمەن بىرگە سەزىمى، ءداستۇرى، ماقساتتى ءومىر سۇرۋدەگى باعىت-باعدارى ورتاقتىعىن ايقىن بىلدىرەدى» دەگەن بولاتىن. ولاي بولسا، شەكەرا، مەملەكەت اتالاتىن شەكتەمەلىكتەرگە قاراماستان قازاق حالقى – ءبىر عانا تۇتاستىقتى، ءبىر عانا ورتاق يدەيانى ۇستانۋى كەرەك.

ساياساتكەرلەر، ۇلتشىلدار، قالامگەرلەر ءار ءتۇرلى جۇمىستار اتقارار. ءسىز ءوز باسىڭىزدان نە ىستەيسىز؟ ارينە،  افينا مەكتەبىن نەگىزگە الا وتىرىپ، وزگە ءتىل مەن وزگە ءدىننىڭ اياسىن شەكتەيتىن ۇلتتىق نامىستى كوتەرىڭىز.  ماحاتما گاندي ساباعىن ۇيرەنە وتىرىپ، جۇڭگو مەن ورىستىڭ ونىمىنە كوز ساتپاي، قازاقستاندىق ونىمدەردى عانا پايدالانىڭىز. مۇنى جۇزەگە اسىرا العان ءار ءبىر قازاق ازاماتى ۇلتىنا، مەملەكەتىنە ۇلتتىڭ ناعىز ادال، جاناشىر پەرزەنتى رەتىندە داڭقتى قىزمەت ەتكەن بولار ەدى.

ايتالىق، ماشينامەن ءجۇرسىز، بەنزيندى قايدان قۇياسىز؟ الەۋمەتتىك جەلىدە وسى ماسەلە بويىنشا «قىتايدىڭ «Sin oil» كومپانياسىنان بەنزين قۇيمايىق!» دەگەن ۇراندى تاقىرىپ ءجۇر. مىنە، ۇلتشىلدىق دەگەنىمىز ءدال وسىنداي قاراپايىم، ناقتى ىستەن باستاۋ الادى. بۇل اۋىزدا ايتىپ قانا قويۋ ەمەس، قولمەن ىستەلگەن قاراپايىم عانا قارسىلىق، ءبىراق ءمانى زور. بارلىق قازاق ازاماتى وتانشىلدىقتى، ۇلتشىلدىقتى وتباسىنان وربىتەتىن وسىنداي يدەيالاردى كوتەرسە، تۇتاس ۇلت،  حالىق – قامالى بەرىك، الىنباس قورعانعا اينالار ەدى. التاۋ الا بولماي، تورتەۋ تۇگەل بولىپ، ءبىر جاعادان باس، ءبىر جەڭنەن قول شىعارساق، وندا ازۋىن ايعا بىلەگەن باعزى تۇركى رۋحى باس كوتەرىپ، جاۋلارىمىز بىزگە جاسقانا قارايتىن بولادى.

ءجادي شاكەن ۇلى