قازاقستاننىڭ فرانسياداعى ەلشىلىگىندە مەملەكەت باسشىسى نۇرسۇلتان نازاربايەۆ بەكىتكەن ۇلتتىق دومبىرا كۇنىنە وراي سالتاناتتى شارا ءوتتى. بۇل تۋرالى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساپ حابارلادى.

شارا بارىسىندا، دياسپورا وكىلدەرى مەن فرانسۋز ازاماتتارى اسىراپ العان قازاق بالالارى، «قورقىت» مادەني ورتالىعىنىڭ جەتكىنشەكتەرى، ەلشىلىك قىزمەتكەرلەرى مەن ولاردىڭ وتباسىلارى بىرلەسە مەرەكەلىك كونسەرتتىك باعدارلاما ۇسىندى. دومبىرادا ۇلى سازگەرلەردىڭ كۇيلەرى مەن تانىمال حالىق اندەرى ورىندالدى. سونداي-اق، كورەرمەندەر قوبىز، جەتىگەن جانە باسقا دا مۋزىكالىق اسپاپتارداعى شىعارمالار تىڭدادى.

قازاقستاننىڭ فرانسياداعى ەلشىسى جان عالييەۆ شارانىڭ اشىلۋىنداعى سوزىندە جينالعان قاۋىمدى قۇتتىقتاپ، ەلباسىنىڭ بۇل مەرەكەنى ەلىمىزدىڭ ۇلتتىق مادەنيەت پەن بىرەگەيلىكتى ساقتاۋ جانە قايتا جاڭعىرتۋ ماقساتىندا بەكىتكەنىن جەتكىزدى. ول، سونداي-اق، 2014 جىلى ءداستۇرلى قازاق دومبىراسىنداعى كۇي ورىنداۋ ونەرى يۋنەسكو-نىڭ ادامزاتتىڭ ماتەريالدىق ەمەس مادەني مۇراسى تىزىمىنە ەنگىزىلگەنىن اتاپ ءوتتى.

سونىمەن قاتار، ج. عالييەۆ فرانسياداعى قازاق مادەنيەتىن ناسيحاتتاۋ بويىنشا بەلسەندى جۇمىسى ءۇشىن «قورقىت» ورتالىعىنا العىسىن ءبىلدىردى. ەلشىنىڭ ايتۋىنشا، وتاندىق ديپلوماتتار شەتەلدە ەلىمىزدىڭ باي ۇلتتىق مادەنيەتىن ىلگەرىلەتۋ جولىندا ۇنەمى جۇمىس اتقارىپ كەلەدى جانە وسىعان بايلانىستى ۇلتتىق دومبىرا كۇنى مەرەكەسىنىڭ بيىل جىل سايىن 2 شىلدەدە اتاپ وتىلەتىن قازاقستان رەسپۋبليكاسىنىڭ ديپلوماتيالىق قىزمەت كۇنى قارساڭىندا وتكىزىلۋىندە ءبىر ءمان بارىن اتاپ ءوتتى.

ەلشىلىكتە باس قوسقاندار دومبىرانى حالقىمىزدىڭ باي مادەني مۇراسىنىڭ نەگىزگى سيمۆولدارىنىڭ ءبىرى ەكەندىگىن اتاپ ءوتتى جانە جاڭا مەرەكە بارلىق قازاقستاندىقتاردىڭ ۇلتتىق بىرەگەيلىگى مەن بىرلىگىن نىعايتۋعا ىقپال ەتەتىن جاقسى ءداستۇردى قالىپتاستىراتىنىنا سەنىم ءبىلدىردى.