2018 جىلعى شىلدەنىڭ ەكىسى «سامۇرىق-قازىنا» ءۇاق» اق باسقارما ءتوراعاسى احمەتجان ەسىموۆ پەن قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ كەزدەسۋ وتكىزىپ، ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى.

تاراپتار شەتەلدىك ينۆەستيسيالاردى تارتۋ، ەلىمىزدىڭ ەنەرگەتيكالىق كەشەنىن دامىتۋ، ترانزيتتىك-كولىك الەۋەتىن ىسكە اسىرۋ، قازاقستاندىق ەكسپورتتى ىلگەرىلەتۋ جانە 2016-2020 جىلدارعا ارنالعان جەكەشەلەندىرۋدىڭ كەشەندى جوسپارىن ىسكە اسىرۋ ماسەلەلەرىنە قاتىستى ءوزارا ءىس-قيمىلدارىن ۇيلەستىرۋ جۇمىستارىن كۇشەيتۋ  جونىندە كەلىسىمگە كەلدى. 

ءوز سوزىندە احمەتجان ەسىموۆ اتالعان قۇجاتقا قول قويۋ مەملەكەت باسشىسىنىڭ ەكونوميكالىق سيپاتتاعى كەڭ اۋقىمدى ماسەلەلەر بويىنشا تاپسىرمالارىن ورىنداۋدا ماڭىزدى كەزەڭگە اينالعانىن اتاپ ءوتتى.

«ءبىز، قول قويعان قۇجات بويىنشا، ق ر سىرتقى ىستەر مينيسترلىگىمەن تىعىز جۇمىس جاسايتىن بولامىز. سامۇرىق-قازىنا قورىنىڭ بيىلعا قويعان ماقساتتارى - وتە ۇلكەن. بىرىنشىدەن، ءبىز ءۇش كومپانيانى IPO-عا شىعارىپ، كەيىن 50 مەكەمەنى جەكەشەلەندىرۋگە جىبەرۋىمىز كەرەك. وعان قىزىعىپ جاتقان شەتەلدىك ينۆەستورلار دا از ەمەس»، - دەپ اتاپ ءوتتى ا.ەسىموۆ. 

ق ر سىرتقى ىستەر مينيسترلىگى مەموراندۋم اياسىندا شەت ەل ەكونوميكاسىنىڭ باسەكەگە قابىلەتتى سالالارى مەن كومپانيالارى بويىنشا وزەكتى اقپاراتتىق-تالداۋ ماتەريالدارىن، سونداي-اق قوردىڭ ەكونوميكالىق تاقىرىپتاعى حالىقارالىق ءىس-شارالار كۇنتىزبەسىنە ەنگىزۋ ءۇشىن شەت ەلدەردە جوسپارلاناتىن بارلىق ماڭىزدى ءىس-شارالار، ەلىمىزگە  كەلۋدى جوسپارلاعان شەتەلدىك بيزنەس-دەلەگاسيالار  تۋرالى اقپاراتتى ۇسىنۋعا، تۇراقتى نەگىزدە شەت ەلدەردە اقپاراتتىق-تۇسىندىرمە جۇمىستارىن جۇرگىزۋگە جاردەم كورسەتۋگە دايىندىعىن ءبىلدىرىپ وتىر.