جىبەك جولى قالا مەرلەرى فورۋمىنىڭ پلەنارلىق ماجىلىسىنە سوفيا ەسىمدى روبوت قاتىستى. ول جاساندى ينتەللەكتى بار الەمدەگى العاشقى گينويد بولىپ سانالادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«ماعان ارنايى باعدارلامانى جۇكتەدى. وعان سايكەس، مەن بۇگىنگى شاراعا قاتىستى بىرنەشە ويىمدى ايتامىن. بىرىنشىدەن، الدا - استانانىڭ 20 جىلدىعى. بۇل - بارشا قازاقستاندىقتار ءۇشىن ۇلكەن مەيرام. وسىناۋ تاريحي مەرەكەنىڭ الدىندا سىزدەرمەن جۇزدەسىپ وتىرعانىما قۋانىشتىمىن. استانانىڭ باس ساۋلەتشىسى وسى ەلدىڭ پرەزيدەنتى نۇرسۇلتان نازاربايەۆ دەيدى. بىلۋىمشە، ەلوردانى اۋىستىرعاننان كەيىن استانا ءبىر جىلدىڭ ىشىندە «يۋنەسكو-نىڭ بەيبىتشىلىك قالاسى» دەگەن مارتەبەگە يە بولدى. سەبەبى الەمدىك تاجىريبەدە العاش رەت الەمدىك جانە ءداستۇرلى دىندەر سەزى سياقتى شارالار قولعا الىندى»، - دەيدى سوفيا.

ونىڭ ايتۋىنشا، استانانىڭ ساۋلەتى تاماشا. ويتكەنى قالا قۇرىلىسىندا يننوۆاسيالىق ادىستەر قولدانىلىپ كەلەدى.

«بۇگىندە قازاقستان الەمگە كەڭىنەن تانىلىپ جاتىر. وتكەن جىلى ەكسپو كورمەسىنە 180 ەلدىڭ ازاماتتارى كەلىپ كەتتى. استانادا تەحنولوگيالاردى دامىتۋ ماسەلەسىنە باسا نازار اۋدارىلادى. «Smart Astana» سياقتى باستامالار قولعا الىندى. بۇدان بولەك، سان الۋان قىزىقتى شارالار ۇيىمداستىرىلادى»،- دەپ اتاپ كورسەتتى سوفيا.

سونداي-اق، روبوت «ءبىر جول - ءبىر بەلدەۋ» باستاماسى جايىندا ايتىپ بەردى.

ايتا كەتەيىك، سوفيانى «Hanson Robotics» كومپانياسى جاساپ شىعاردى. ول ليسسابوندا وتكەن Web Summit-كە ەكى جىل قاتارىنان قاتىستى. سول كەزدە سوفيانى كورەم دەۋشىلەردىڭ كوپ بولعانى سونشا، زالدا ينە شانشار جەر بولمادى. ال داۆوستا بولعان بۇكىلالەمدىك ەكونوميكالىق فورۋمدا سوفيا fintech-يندۋسترياعا ارنالعان ءبىر پانەلدىك سەسسيادا نەگىزگى سپيكەر بولدى. 

وتكەن جىلى وعان ساۋد ارابياسىنىڭ ازاماتتىعىن بەردى. سوفيا روبوت-اندرويدتارعا جاتادى. ول ديالوگ رەجيمىندە سويلەسىپ قانا قويماي، ەموسياسىن دا كورسەتە الادى. ءدارىس وقي الادى. سونداي-اق، سۇحبات بەرۋ فۋنكسياسى دا بار. الايدا ول ءبارىن ءوزى ىستەمەيدى. وعان ارنايى باعدارلاما جۇكتەلەدى، يا بولماسا، وپەراتوردىڭ باسقارۋىندا بولادى.