شىمكەنتتە پودەزد ىشىندە بالاعا شابۋىل جاساعان كۇدىكتىنى قاماۋعا الۋ تۋرالى بۇيرىق شىقتى. بۇل تۋرالى قالانىڭ ەڭبەكشى اۋداندىق سوتى حابارلادى، دەپ جازادى Qamshy.kz اقپارات اگەنتتىگى.

سانكسيا ەكى ايعا بەرىلدى. سوت ۆەدومستۆوسىنىڭ دەرەگى بويىنشا، كامەلەت جاسقا تولماعان بالاعا شابۋىل جاساعان ەر ادامعا قاتىستى ق ر قىلمىستىق كودەكسى 121-باپتىڭ «كامەلەتكە تولماعان بالاعا قارسى جىنىستىق سيپاتتاعى زورلىق-زومبىلىق اكتىلەرى» بويىنشا سوتقا دەيىنگى تەرگەۋ جۇمىستارى باستالدى.

ايتا كەتەيىك، بىرنەشە كۇنننەن بەرى الەۋمەتتىك جەلىدە كامەلەت جاسقا تولماعان ءجاسوسپىرىم بالاعا شابۋىل جاساعان ەر ادامنىڭ ۆيدەوسى قىزۋ تالقىلانىپ كەلەدى. ۆيدەونى كورگەن قازاقستاندىقتار جاعاسىن ۇستاپ جاتىر.

انىقتالعانداي وقيعا شىمكەنت قالاسىندا، 1 شىلدە كۇنى بولعان.

ۆيدەودان ەر ادامنىڭ بالانى پودەزگە كىرگىزىپ، ارتىنشا باسپالداقتىڭ ارتىنا جاسىرىنعانىن بايقايمىز. كەيىن كىرەبەرىسكە ءبىر ايەل كىرىپ قالىپ، ەر ادام سىرتقا قاراي قاشا جونەلەدى. ۆيدەو بەينەباقىلاۋ كامەراسىنا ءتۇسىپ قالعان.

پوليسيا دەرەكتەرىنە سايكەس، كۇدىكتى 1985 جىلعى شىمكەنت تۇرعىنى بولىپ شىقتى. ول كىناسىن تولىق مويىندادى. ال پەدوفيلدىڭ قۇربانى بولعان 11 جاستاعى بالا ءقازىر دارىگەرلەردىڭ باقىلاۋىندا.